Belgili saiasattanýshy Aidos Sarym Prezident Qasym-Jomart Toqaevtyń bastamasymen qurylatyn Ulttyq qoǵamdyq senim keńesine qatysty pikir bildirdi.
Eske salaiyq, búgin 12 maýsymda Nur-Sultan qalasynda ótken inaýgýratsiiadan keiin sóz sóilegen Memleket basshysy Ulttyq qoǵamdyq senim keńesin qurý týraly josparyn aitqan edi. Sondai-aq, Prezident atalǵan Keńesti qurý týraly Jarlyqqa qol qoidy, dep habarlaidy QazAqparat tilshisi.
«Jalpy, bul keńeske júkteletin mindetterdiń iske asýy birqatar qadamdarǵa bailanysty. Eń aldymen, Keńes erejesin durys bekitip, sodan keiin, onyń quramynyń aýqymdy bolýy, iaǵni qoǵamnyń árbir salasynda júrgen ár kúshterdiń atynan shyqqan azamattardyń basyn qosa bilý mańyzdy. Sol keńeske qoǵamǵa sózi ótetin azamattardyń kóptep enip, olar bir-birine qurmetpen qarai otyryp, tiisti sheshimderdi shyǵarýǵa qaýqarly bolýy kerek. Jumystyń tabysty bolýy kóbine osyǵan bailanysty», - dedi saiasattanýshy.
Onyń aitýynsha, keńes quramyna engen músheler qoǵamdaǵy eń ózekti máselelerge nazar aýdaryp, der kezinde talqylai bilýi shart.
«Ekinshiden, keńes ózekti ári negizgi máselelerdi ortaǵa salyp, sol boiynsha tisti qujattardyń nusqasyn, jobasyn shyǵara alatyn uiym bolýy qajet dep eseptei alamyn. Sailaý, BAQ, mitingter týraly, sondai-aq saiasi partiialar men qoǵamdyq birlestikter jónindegi zańnamanyń qaita qaralýyn kópten beri aityp júrgender bar. Eger osylardyń negizgi tujyrymdamasyn, negizgi ideiasyn bekitip, sony zańgerlerge tabystap, durys nusqalaryn jasap, ony Parlamentke engizse, onda Ulttyq qoǵamdyq senim keńesi ózine júktelgen mindetti oryndai alady degen pikirdemin», - dedi Aidos Sarym.
Saiasattanýshynyń paiymynsha, sailaý naýqanynyń aiaqtalýyna bailanysty negizgi emotsiialar taraǵannan keiin, qoǵammen sóilesý, qoǵamdyq-saiasi kúshtermen aqyldasý, keńesý jumystary júrgizilýi kerek. Sosyn Prezident bastama jasap otyrǵan keńeske kóptegen bilikti azamattardyń kelýin qamtamasyz etken jón.
«Qoǵamda tanylǵan, bedeldi azamattardyń birlese jumys isteýine alǵysharttar jasaý, senimdi orta qalyptastyrý mańyzdy», - dedi A. Sarym.
Budan buryn habarlanǵandai, búgin ulyqtaý rásiminda Prezident Qasym-Jomart Toqaev Ulttyq qoǵamdyq senim keńesin qurýdy kózdep otyrǵanyn málim etti.
«Men Ulttyq qoǵamdyq senim keńesin qurý jón dep sheshtim. Onyń quramyna barlyq birlestik ókilderi men jastar enedi. Ulttyq qoǵamdyq senim keńesiniń alǵashqy otyrysy osy jyldyń tamyz aiynda ótedi. Bilik halyqqa bergen barlyq ýádesin oryndaýy tiis», - dedi Qasym-Jomart Toqaev elordadaǵy ulyqtaý rásiminde.
