Aldaǵy sailaý durys ótetin bolsa, ony shyn máninde Qazaqstannyń qoǵamy moiyndasa onda bul qoǵamnyń, eldiń birligin pash ete alatyn jaǵdai. Bul týraly saiasattanýshy Aidos Sarym Almatyda ótken saraptamalyq otyrysta aitty, dep habarlaidy baq.kz.
Onyń aitýynsha, biylǵy sailaý ózgeshe, óitkeni 2005-2006 jyldan beri eshbir demokratiialyq kúshterdiń, ulttyq kúshterdiń ókilderi sailaýǵa jiberilgen joq.
«Qazir jaǵdai ózgeshe, jeti kandidat usynylyp otyr. Munyń ózi de - úlken jańalyq. Bir áiel adam shyǵyp jatyr, bul da - Qazaqstan tarihynda bolmaǵan jańalyq. Eldiń bolashaǵy turǵysynan qaraityn bolsaq, qyz-kelinshekter úshin jaqsy múmkindik», - deidi ol.
Sonymen qatar ainalamyzda ártúrli dárejedegi oqiǵalar bolyp jatqanyn aita kele, bireýler Ýkrainany aityp Zelenskiimen salystyryp jatqanyn, endi biri Armeniiadaǵy Posheniiandy mysal etip jatqanyn jetkizdi.
«Jalpy liberilizatsiianyń artyqshylyǵymen qatar qaýip-qaterleri de bolady. Máselen elestetip kórińizshi, kishkentai qapyryq bólmede otyrsyz deiik, onda bireý temeki shegip otyr, taǵy bireýi tamaq pisirip otyr, endi biri qoryldap uiyqtap jatyr. Ishinde tynys alý múmkin bolmai qalǵanda bireý keldi de kishkentai terezeni ashyp qaldy, bári topyrlap terezege qarai júgirdi. Sondai effekt bolmaý kerek», - deidi Aidos Sarym.
Saiasattanýshynyń paiymdaýynsha, qazir bilik belgili bir dárejede liberilizatsiiaǵa baryp jatyr. Jurt ta, qoǵam da biliktiń pármeni qashanǵa deiin jetedi eken, bizdiń erkindigimiz qai jerge deiin barady eken dep teksergisi keledi. Ekinshi jaǵynan bul jerde qaýip-qaterde bar kórinedi.
«Mysaly, bireýlerdiń sandyraǵyna ilesip, basqa da jaǵdailarǵa baryp jatsaq bul qiianatqa apara ma, aparmai ma degen suraq týyndaidy. Bul - biliktiń ózine de úlken tireý. Mysaly jeltoqsan oqiǵasy alaiyq. Kezinde Sovet odaǵynyń biligi «bizde betburys bastaldy, jeńildikter bolady» dedi. Soǵan qazaq jastary shynymen ilandy. Onyń arty qandy oqiǵaǵa alyp keldi. Ábden qorqyp, burynǵy dástúrden shyǵa almaǵan rejim ainalyp kelip ony qanǵa bóktirdi. Bir jaǵynan osyndai máselelerden saqtanýymyz kerek. Sondyqtan qandai shara bolsyn bárin baiybymen, esimizdi saqtai otyryp, jan-jaǵymyzǵa qarap ótkizgen durys», - deidi ol.
Sondai-aq, ol 19 naýryz úlken ózgeristerdi alyp kelgenin, úmitter paida bolǵanyn aitty.
«Eshkim oilamaǵan jerden biliktiń tranziti bastalyp ketti. Bul - biliktiń tranziti. Sosyn Nur Otan partiiasynyń sezi ótti, bilik óziniń kandidatýrasyn biraýyzdan usyndy, eshqandai talas bolǵan joq. Iaǵni bilik óziniń bir ekenin dáleldei aldy. Endi 9 maýsymnan kútetin másele óte kóp. Ol kezde sailaý durys ótetin bolsa, ony shyn máninde Qazaqstannyń qoǵamy moiyndasa. Bul burynǵy sailaýdan ózgeshe, rasymen de ózgerister bolady eken degen paiym bolsa, sailaýǵa túsken kandidattar «biz barynsha jumys istedik, alǵan daýys ózimizdiki, bizdiń daýys esh urlanǵan joq» dese, bilik burynǵydai 90% emes, óziniń kópshil daýysyna ie bolyp jatsa, onda bul qoǵamnyń, eldiń birligin pash ete alady», - deidi ol.
