Belgili saiasattanýshy Aidos Sarym Aqparat jáne qoǵamdyq damý ministrliginiń qoldaýymen uiymdastyrylǵan «Policy Camp» Respýblikalyq jas saiasattanýshylardyń onlain mektebiniń suqbat alańynda saiasi partiialardyń róli týraly aitty, dep habarlaidy QazAqparat.
Onyń aitýynsha, saiasi ómir Almaty, Nur-Sultan jáne birneshe oblys ortalyqtarynda ǵana bar.
«Saiasat – erikkeniń ermegi emes. Bir ǵana mysal keltireiin. Bizde partiia tizimi degen uǵym bar. Partiia usynyp otyrǵan tizimdegi úmitkerge 639 myń teńge aqsha tóleýi kerek. Iaǵni, 10 adam usynsańyz 6 mln, 100 adam usynsańyz 63 mln teńge qajet. Bul tek qana tizimdi usyný úshin. Ol ońai emes. Iaǵni, ekiniń biri partiia qura almaidy. Meniń oiymsha, kóp partiiadan góri árbir aimaqta, aýdanda, aýylda naqty, myqty ókili bar partiia kerek. Bizge jalpyulttyq partiialar qajet. Men shaǵyn partiialarǵa qarsymyn. Sebebi, bizdiń elde separatizm degen áńgime bar. Partiia degenimzi ol – saiasi mashina. Mysaly, Qarǵyzstanda 200 partiia bar. Solardyń tek 15-i ǵana sailaýǵa aqsha jinai aldy. Qazir qarjylary taýsylyp, qalai sailaýǵa túsemiz dep otyr. Bizdiń elde saiasi ómir Almaty, Nur-Sultan jáne sanaýly oblys ortalyqtarynda ǵana júrip jatyr»,– deidi saiasattanýshy.
Sonymen qatar, ol qoǵamda saiasi belsendiliktiń tómen ekenin tilge tiek etti.
«Bizdiń qoǵam, halyq kóp nárseni shatastyrady. Onyń ishinde saiasattyń maqsaty men saiasattyń keibir quralyn shatastyryp alady. Feisbýkke post jazý — saiasat emes. Ol saiasatty jetkizý. Miting, piket ótkizý ol saiasat emes - ol belgili maqsattan týyndaǵan qajettilik. Sony bilikke jetkizýdiń joly. Saiasattyń eń úlken maqsaty, múdessi - ol biýdjet, zańdar men baǵdarlamalar. Parlamentte sóilegen sózderdiń bári saiasat emes. Shyn saiasat sen bir baǵdarlama ázirlep, ony qorǵap, dáleldei alsań — sol»,– deidi ol.
Saiasattanýshy saiasi júie belgili bir ýaqytta daǵdarysqa túsip otyratynyn jetkizdi.
«Daǵdarystan qoryqpaý kerek. Saiasi taptyń ózgeriske daiyn nemese daiyn emestigin aiqyndap beredi. Qytaidyń myqty bir tujyrymdamasy bar. Ol «Aspan mandaty» dep atalady. Eger belgili bir júie qandai da bir jolmen bilikke kelsin, kelmesin, eń bastysy búkil synaqtan, saiasi dodadan, tozaqtan aman ótetin bolsa, iaǵni aspannyń ózi oǵan mandat berdi. Onyń bilikke qaqysy bar. Sol siiaqty saiasi júiede «aspan mandatyn» qiyn qystaý, daǵdarys kezinde dáleldep otyrý kerek. Osydan aman shyqty ma, iaǵni potentsialy bar. Bizde ekiniń biri kóp áńgime aitady. «Búgingi bilik ermeksaz, búgingi bilik karton» dep jatady. Bul karton memleket áli talai adamnyń ómirin ózgertip jiberýi múmkin. Jaqsy bolsyn, jaman bolsyn, myqty memleket kóp nárseni sheshe alady. Qirap jatqan joqpyz, dalada tezek terip júrgen joqpyz. Ras, qiyndyqtar bar, kedeishilik bar, ony joqqa shyǵara almaimyz. Ony aitý kerek. Onymen kúresý kerek. Biraq álsiz memleket emespiz»,– dep qorytyndylady Aidos Sarym.
