Belgili qazaqstandyq saiasattanýshy Aidos Sarym Memleket basshysy Nursultan Nazarbaevtyń jariialaǵan bes áleýmettik bastamasy týraly pikirin bildirdi, dep habarlaidy «QazAqparat» tilshisi.
«Bul - elimizde jáne álemde bolyp jatqan oqiǵalarǵa berilgen, eń aldymen áleýmettik mazmuny bar keshendi jaýap. Qazaqstan jumys oryndaryn ashý múmkindigi kúrdeli memleket. Osy jaǵdaida Astanany gazdandyrý men ony ary qarai basqa óńirlerge uzartý «EKSPO» kórmesinen salystyrýǵa bolatyndai jobalardyń biri bolyp tabylady. Bul - jańa jumys oryndary men jańa investitsiialar. Gaz qubyrlarynyń baǵdaryndaǵy kóptegen turǵylyqty eldi mekender óziniń áleýmettik-ekonomikalyq kórsetkishterin jaqsarta alady», - dep pikirin bildirdi Aidos Sarym.
Saiasattanýshy óz sózinde gazdandyrý jobasy elorda turǵyndary men Astananyń jalpy ekonomikasy úshin aýqymdy ilgerileýshilik bolatynyna senim bildirdi.
«Qoljetimdi baspana týraly aitylýdyń mańyzy odan kem emes. Ipotekalyq baǵalardyń tómendeýi, olardyń bir deńgeide belgilenýi, uzartylýy - osy usynys paketteriniń ishindegi eń mańyzdy qadam dep aitýǵa bolady. Bul aiqyndylyqqa, jańadan ómir bastap kele jatqan jas otbasylarǵa josparlai bilýge jol ashady», - dedi saiasattanýshy.
Onyń aitýynsha, Prezidenttiń bastamalary ekonomikany saýyqtyrýǵa baǵyttalǵan.
«Bul bastamalardy júzege asyrý úshin Úkimet qarjylandyrýdyń mehanizmderi men qainar kózderi boiynsha jumysty aiqyndaityn bolady. Sol kezde tereńirek aitýǵa bolar. Biraq, jalpy bul bastamalar júzege asyrylsa, keleshekte el ekonomikasynyń ósimine oń serpin beredi», - dep túidi Aidos Sarym.
