Foto: gov.kz
Aýyl sharýashylyǵy ministri Aidarbek Saparov Jambyl oblysy fermerleriniń narazylyq aktsiiasyna qatysty pikir bildirdi, dep habarlaidy Kazinform agenttigi.
«Úkimet rezervinen 392 sharýashylyqtyń shyǵynyn óteý úshin 3,7 mlrd teńge bólindi. Búgingi tańda onyń 1,7 mlrd teńgesi igerilip, 246 sharýashylyq qarajattaryn aldy. Narazylyqqa shyqqandarǵa qatysty aitar bolsaq, olardyń qujattarynda qatelikter bar. Sondyqtan da olar qazirgi ýaqytta qarajattaryn ala almai otyr. Eger olar barlyq qatelikterin joiatyn bolsa, onda esh kedergisiz alady. Tizimde 392 sharýashylyq bar. Áli de 2 mlrd teńgeni igerý qajet. Tipti osy qarajatty igere alamyz ba, joq pa dep alańdap otyrmyz», - dedi Aýyl sharýashylyǵy ministri Úkimet otyrysynan keiingi baspasóz máslihatynda.
Aidarbek Saparovtyń naqtylai túsýinshe, óńirdiń birqatar fermeri ótemaqy alýǵa usynǵan qujattaryndaǵy derekter sáikes kelmeidi. Sonymen qatar qate toltyrylǵan qujattar da bar.
Buǵan deiin aqparat quraly biyl Jambyl oblysynyń 6 aýdany qurǵaqshylyqtan zardap shekkenin, óńirde tótenshe jaǵdai jariialanǵanyn jazǵan edi. Osydan keiin fermerlerdiń shyǵynyn óteý úshin ótemaqy tólenýi tiis bolatyn. Alaida taiaýda óńir fermerleri narazylyq tanytyp, qarajattaryn áli almaǵanyn aityp dabyl qaqqan-dy.
