فوتو: gov.kz
اۋىل شارۋاشىلىعى مينيسترٸ ايداربەك ساپاروۆ جامبىل وبلىسى فەرمەرلەرٸنٸڭ نارازىلىق اكتسيياسىنا قاتىستى پٸكٸر بٸلدٸردٸ, دەپ حابارلايدى Kazinform اگەنتتٸگٸ.
«ٷكٸمەت رەزەرۆٸنەن 392 شارۋاشىلىقتىڭ شىعىنىن ٶتەۋ ٷشٸن 3,7 ملرد تەڭگە بٶلٸندٸ. بٷگٸنگٸ تاڭدا ونىڭ 1,7 ملرد تەڭگەسٸ يگەرٸلٸپ, 246 شارۋاشىلىق قاراجاتتارىن الدى. نارازىلىققا شىققاندارعا قاتىستى ايتار بولساق, ولاردىڭ قۇجاتتارىندا قاتەلٸكتەر بار. سوندىقتان دا ولار قازٸرگٸ ۋاقىتتا قاراجاتتارىن الا الماي وتىر. ەگەر ولار بارلىق قاتەلٸكتەرٸن جوياتىن بولسا, وندا ەش كەدەرگٸسٸز الادى. تٸزٸمدە 392 شارۋاشىلىق بار. ەلٸ دە 2 ملرد تەڭگەنٸ يگەرۋ قاجەت. تٸپتٸ وسى قاراجاتتى يگەرە الامىز با, جوق پا دەپ الاڭداپ وتىرمىز», - دەدٸ اۋىل شارۋاشىلىعى مينيسترٸ ٷكٸمەت وتىرىسىنان كەيٸنگٸ باسپاسٶز مەسليحاتىندا.
ايداربەك ساپاروۆتىڭ ناقتىلاي تٷسۋٸنشە, ٶڭٸردٸڭ بٸرقاتار فەرمەرٸ ٶتەماقى الۋعا ۇسىنعان قۇجاتتارىنداعى دەرەكتەر سەيكەس كەلمەيدٸ. سونىمەن قاتار قاتە تولتىرىلعان قۇجاتتار دا بار.
بۇعان دەيٸن اقپارات قۇرالى بيىل جامبىل وبلىسىنىڭ 6 اۋدانى قۇرعاقشىلىقتان زارداپ شەككەنٸن, ٶڭٸردە تٶتەنشە جاعداي جارييالانعانىن جازعان ەدٸ. وسىدان كەيٸن فەرمەرلەردٸڭ شىعىنىن ٶتەۋ ٷشٸن ٶتەماقى تٶلەنۋٸ تيٸس بولاتىن. الايدا تاياۋدا ٶڭٸر فەرمەرلەرٸ نارازىلىق تانىتىپ, قاراجاتتارىن ەلٸ الماعانىن ايتىپ دابىل قاققان-دى.
