Qazaqstan Respýblikasy Mádeniet jáne sport ministrligi «Aiboz» ulttyq tuńǵysh ádebi syilyǵyna baiqaý jariialady, dep habarlaidy "Ult aqparat".
«Úzdik proza», «Úzdik poeziia», «Úzdik drama», «Úzdik kórkem aýdarma», «Úzdik balalar ádebieti», «Úzdik komiks» jáne «Kitaptyń úzdik dizainy» nominatsiialary boiynsha jeńimpaz atanǵandar 5 million teńgeden aqshalai syilyq alady. Konkýrs nátijesinen soń olardyń eńbekteri 500 danamen jaryq kóredi.
Búgin ulttyq ádebi syilyqtyń tusaýkeseri ziialy qaýym ókilderiniń, aqyn-jazýshylardyń qatysýymen ótti. Mádeniet jáne sport ministri Dáýren Abaev bul jobanyń mindeti – ádebietshilerdi qoldaý ǵana emes, sonymen qatar jazýshylyq ónerdiń airyqsha áleýmettik mańyzdylyǵyn qoǵamǵa kórsetý ekenin atap ótti.
«Basty maqsatymyz – tól ádebietimizdi tyń dúnielermen tolyqtyryp, ony jańasha biikke kóterý, sondai-aq, ultymyzdyń ádebi murasyn molaityp, otandyq ádebietke jańa serpin berý. Bul syilyqtyń taǵy bir ereksheligi – úzdik dep tanylǵan shyǵarmalar basyp shyǵarylyp, kitaphanalarǵa taratylady. Qatysýshylardyń jasyna, eńbek janryna, jazý tiline shekteý joq. Eń bastysy – shyǵarma mazmundy, ózekti bolýǵa tiis. Qysqa bolǵanymen eldiń esinde qalyp, jurtshylyqtyń aýzynan túspeitindei týyndy jazsa, báige soǵan buiyrady. Bul-otandyq kitap shyǵarý isi men ádebietti qoldaý baǵytynda júzege asyryp jatqan is-sharalardyń biri ǵana. El Prezidenti belgilep bergendei, bizdiń túpki maqsatymyz – oqityn ult qalyptastyrý. Ol úshin biz «Jańa qazaq ádebieti» seriiasyn qosa alǵanda, jas avtorlardy qoldaýdyń jańashyl tetikterin quryp, memlekettik sýbsidiialaý kólemin ulǵaityp jatyrmyz. Granttar men syilyqtar jariialap, kitap jármeńkelerin ótkizip kelemiz. Bolashaqta proza, poeziia jáne dramatýrgiiadaǵy eń myqty jas talanttardy qoldaý jáne tabiǵi qabiletin shyńdaýǵa arnalǵan «ádebi zerthana» ashýdy josparlap otyrmyz», – dedi Dáýren Abaev.
Aita keteiik, baiqaýǵa otandyq jazýshylar qatysa alady. Ótinimderdi myna elektrondy mekenjaiǵa 2022 jylǵy 15 maýsymnan 1 qazanǵa deiin jiberý qajet: aiboz@kitap-palatasy.kz
Ádebi syilyq jyl sońynda beriledi (tolyǵyraq www.kitap-palatasy.kz saitynda jazylǵan).
