Memleketimizdiń basty bailyǵy – eldiń tatýlyǵy. Beibit elde ǵana bereke bolady. Nur Otan partiiasy tóraǵasynyń birinshi orynbasary Baýyrjan Baibek osylai deidi, dep habarlaidy "Ult aqparat".
«Shaǵyn kikiljińnen qandai jaǵdaidyń oryn alatynyn keshegi Qordai oqiǵasy kórsetip otyr. Eregistiń sońy úlken janjalǵa ulasty. Adam shyǵyny boldy. Olardyń imany salamat bolsyn. Biz osyndai sátterde ashýdy aqylǵa jeńdirip, sabyrlyq tanytqanymyz jón.
El Prezidenti Qasym-Jomart Toqaev Qordaida oryn alǵan oqiǵaǵa bailanysty málimdeme jasap, qaza bolǵan azamattardyń otbasylaryna kóńil aitty. Olarǵa tiisti kómek kórsetýdi tapsyrdy. Elde zań ústemdiginiń saqtalatynyn qadap aityp, Premer-Ministrdiń orynbasary tóraǵalyq etetin Úkimet komissiiasyn qurdy», - dep jazady Baýyrjan Baibek Instagram paraqshasynda. ⠀
Onyń aitýynsha, Qazaqstannyń tynyshtyǵy, eń aldymen, el iesi halqymyzǵa kerek. Zańǵa baǵyný - barlyq qazaqstandyqtardyń mindeti. Quzyrly organdarǵa kúsh kórsetýge eshkimge jol berilmeidi.⠀
«Ultaralyq qarym-qatynas – óte názik dúnie. Áp-sátte búldirip alý ońai. Eger elde tatýlyq bolmasa, eń aldymen zardap shegetin halyq. Zańǵa júgingen, tatýlyq pen eldikti murat etken Elbasy saiasatyn ustanǵan elmiz. Barlyq másele zań aiasynda sheshilýi tiis. Barshamyz, eń aldymen, partiialastar, osyǵan umtylýymyz kerek», - deidi partiia basshysy.
