Qazaqstan pedagogika ǵylymdary akademiiasynyń akademigi, Qazaqstan Eńbek eri Aiagúl Mirazova ulttyq mektep jaily aitatyn kez kelgenin málim etti, dep habarlaidy QazAqparat.
«Táýelsizdik alǵan kezden bastap Elbasy dástúrli Joldaýlarynda, onyń ishinde «Bolashaqqa baǵdar: Rýhani jańǵyrý», «Uly dalanyń jeti qyry» maqalalarynda otbasylyq institýt máselesi jaily jazǵan edi. Memleket basshysy da Bilim kúni eldiń bárine erekshe oi salyp, Qazaqstan halqyna Joldaýyn jariialady. Qýanyshymyzda shek joq. Óitkeni ulttyń jańa bolmysyn qalyptastyrýǵa arnalǵan taraýynda adamdy jáne qoǵamdy ýaqyt talabyna sai jetildirý qajettigin ómirdiń ózi kórsetip otyrǵanyn jetkizdi», - dedi Aiagúl Mirazova «Otbasy kúni» aiasynda ulttyq tárbie berý men otbasy qundylyqtaryn damytý máseleleri talqylanǵan dóńgelek ústel otyrysynda.
Akademiktiń aitýynsha, qazaq balalaryn tárbieleýde ulttyń oishyldarynyń taǵylymyn basshylyqqa alýymyz kerek.
«Batystyń bizge jaqsysymen birge jamany da enip ketti. Mine, sol úshin bilimnen buryn - tárbie turýy kerek. Jańa Joldaýda «ulttyń sapasyn anyqtaityn qundylyqtar retinde bilim, eńbek, kásip, temirdei tártip, jaýapkershilik, ádildik, tiianaqtylyq, uqyptylyq atalyp ótti. Osynyń bári januiadan bastalyp, balabaqsha men mektepte shyńdalatyn qasietter. Ózim 25 jyl direktor boldym. Qazir bizde qazaq jáne orys mektepteri bar. Buryn ulttyq mektep degendi kóp aita almadyq. Endi qazir aitatyn kez keldi», - deidi ol.
Aiagúl Mirazovanyń sózinshe, tilimizdiń qoldanys aiasyn barynsha keńeitýdiń arqasynda memleketimizdiń bolashaǵyn jarqyn etýge bolady.
«Sondyqtan otbasy qundylyqtary negizinde ulttyq tárbie berý máselesimen ainalysqanda jańa kózqaras, jańa ustanym kerek», - deidi ol.
