QR Eńbek jáne halyqty áleýmettik qorǵaý ministrligi 113 meditsinalyq-áleýmettik mekemege jiti tekserý júrgizý jaily bastama kóterdi. Jospardan tys tekserýge Aiagózdegi arnaiy áleýmettik kómek ortalyǵynda tórt tárbielenýshiniń kóz jumýy sebep bolyp otyr, dep habarlaidy "Ult aqparat".
Ministrliktiń baspasóz qyzmeti usynǵan málimetke súiensek, birinshi kezekte tirek-qimyl apparaty buzylǵan balalardy ońaltatyn arnaiy áleýmettik qyzmet kórsetý ortalyqtaryna, sondai-aq psihonevrologiialyq aýrýlary bar balalarǵa arnalǵan ortalyqtarǵa tekserý júrgizilmek. Tekserý meditsinalyq-áleýmettik qyzmetterdi kórsetýge qoiylatyn barlyq talaptardyń saqtalýyna jáne sol mekemelerdegi balalardyń turmystyq jaǵdaiyna bailanysty bolady.
Búginde Qazaqstanda múgedek balalarǵa arnalǵan 20 memlekettik ońaltý ortalyǵy jumys isteidi, onda 1,8 myńnan astam bala turyp jatyr.
Barlyq 113 meditsinalyq-áleýmettik mekemede keshendi tekserý júrgizilmek. onyń ishinde:
178 adam qamtylǵan 4 tirek-qimyl apparaty buzylǵan balalarǵa áleýmettik qyzmet kórsetý ortalyǵy;
168 adamdy qamtityn psihologiialyq patologiiasy bar balalarǵa arnalǵan 16 áleýmettik qyzmet kórsetý ortalyǵy;
8 364 adam turyp jatqan qarttar men múgedekterge arnalǵan 45 áleýmettik qyzmet kórsetý ortalyǵy;
14 160 adamǵa arnalǵan 48 psihonevrologiialyq áleýmettik qyzmet kórsetý ortalyǵy bar.
Jalpy áleýmettik qyzmet kórsetý ortalyqtarynda 24 myńnan astam adam turýda. Atalmysh mekemeler jergilikti atqarýshy organdardyń qaramaǵynda.
Esterińizge sala ketsek, osyǵan deiin Aiagózdegi áleýmettik kómek ortalyǵynda 4 balanyń qaitys bolǵandyǵy jaily habarlanǵan.
