Shyǵys Qazaqstan oblysynyń Aiagóz qalasynda qatty jeldiń saldarynan 19 kópqabatty jáne 72 jer úi, sondai-aq 8 ákimshilik ǵimarat zaqymdanǵan, dep habarlaidy "Ult aqparat".
Búginde Aiagóz aýdanynda tótenshe jaǵdai jariialandy. ShQO ákiminiń orynbasary Baqytjan Baiahmetov bastaǵan arnaiy komissiia sol jerge attanǵan. Bul jaily aimaq basshysy Danial Ahmetov Instagram-daǵy jeke paraqshasynda jazdy.
«Keshe keshke Aiagóz aýdanynda jyldamdyǵy sekýndyna 28 metrge jetken ekpindi jel soqty. Aǵashtardyń qulaýy saldarynan elektr jelileri úzildi. Saldarynan 3679 abonent elektr jaryǵynsyz qalǵan. Qazirgi ýaqytta kezeń-kezeńimen jaryq qosylýda. ShQ AEK-nyń 5 jedel brigadasy jaqyn arada qalǵan 700 abonent boiynsha jumysty aiaqtaýy tiis», - dedi ákim.
Onyń aitýynsha, oqiǵa ornynda barlyq kommýnaldyq jáne apattyq qyzmetter jumys isteýde. Buzylǵan ǵimarattardy qalpyna keltirý jumystary bir apta ishinde aiaqtalýy tiis. Bul oraida qajetti qarajat bólinedi.
«Daýyldyń saldarynan qalalyq aýrýhanaǵa túrli dárejedegi jaraqattarmen 7 adam júgingen. Qazir jaǵdailary turaqty, statsionarda bir naýqas jatyr», - deidi Danial Ahmetov.
Esterińizge sala ketsek, osyǵan deiin ShQO-da quiyndy daýyl soqqanyn habarlaǵan bolatynbyz.
