Shyǵys Qazaqstan oblysynyń Aiagóz qalasynda ornalasqan Balalar arnaiy áleýmettik kómek kórsetý ortalyǵyna osyǵan deiin san márte tekseris júrgizildi. Qazir ondaǵy olqylyqtardyń orny tolyqtyrylǵan. Bul maqsatta 139,5 mln teńge jumsalypty. Balalardyń qaýipsizdigin qamtamasyz etý úshin 51 kamera qoiylyp, oiyn alańy da abattandyrylǵan. Jýyqta arnaiy qurylǵan qoǵamdyq komissiia músheleri ortalyqqa baryp, búgingi ahýaldy baqylap qaitty.
Byltyrdan beri Aiagóz qalasyndaǵy Balalar arnaiy áleýmettik kómek kórsetý ortalyǵyna túrli organdardan 15 ret tekserý jasalyp, birshama olqylyqtar anyqtalǵan. Qazirgi ýaqytta sol kemshilikter túzeldi me? Mine, dál osy suraqqa jaýap izdeý úshin óńirde qoǵamdyq komissiia qurylǵan. Onyń quramyna kópbalaly analar, úkimettik emes uiymdar men BAQ ókilderi kirdi. QazAqparat agenttiginiń tilshisi de komissiia múshesi retinde Aiagóz qalasyna baryp, ortalyqtaǵy jaǵdaidyń mán-jaiyn anyqtap qaitqan edi.
Ortalyqtaǵy ońdy ózgerister
Búgingi tańda ortalyqta 96 tárbielenýshi bar, olardyń 60-tan astamy jetim balalar. Ár balaǵa jasalǵan meditsinalyq kartaǵa logoped pen salalyq mamandardyń emdeý nátijeleri udaiy engiziledi. Sonymen qatar dietologtyń keńesimen tárbielenýshilerge qajetti kaloriia mólsherin eskere otyryp jeke-jeke mázir qurastyrylǵan.
«Biyl mekemege 139,5 mln teńge bólindi. Sonyń aiasynda jóndeý jumystary júrgizilip, 2 balalar alańy abattandyryldy. Jańa jabdyqtar men jihaz alynyp, «bultty» beinebaqylaý júiesi engizildi. 51 kameranyń 44-i ishte, 7-i syrtta», - dedi Balalar arnaiy áleýmettik kómek kórsetý ortalyǵynyń direktory Sholpan Makasheva.
«Bultty» beinebaqylaý júiesi beinejazabalardy qazirgi ýaqytta kórýge jáne olardy joiý nemese ózgertý múmkindiginsiz 90 kúnge deiin serverde saqtaýǵa múmkindik beredi. Barlyq kelip túsken aqparat bultta saqtalady. Bul aqparattyq qaýipsizdik talaptarynyń buzylýyna jáne derekterdiń taralyp ketýine jol bermeidi.
Ortalyq ǵimaratyna qosymsha korpýs ta salynbaq. Osy maqsatta 160,5 mln teńge jumsalady. Onyń birinshi ǵimaratynda medbike bólmesi, em-shara bólmesi, lift shahtasy jáne balalarǵa arnalǵan 3 palata ornalasady. Al ekinshi qabatta oiyn bólmesi, as úi jáne taǵy 2 palata bolmaq.
Osy rette, tekserister nátijesinde anyqtalǵan birqatar zańbuzýshylyqtarǵa toqtala ketsek. Epilepsiiamen aýyratyn 6 balaǵa zańsyz ekpe jasalypty. Sol úshin terapevt dáriger ákimshilik jaýapkershilikke tartylyp, aiyppul arqalady. Budan bólek, psihotropty zattardy paidalaný erejesin buzǵan aǵa medbikeniń isi Aiagóz aýdandyq sotynda qaraldy. Sot úkimimen QR Qylmystyq Kodeksiniń 303-baby 1-bóligimen kináli dep tanylǵan aiyptalýshy qyzmetinen bosatylyp, 20 AEK mólsherinde aiyppul tóleýge mindettelgen. Órt qaýipsizdigi talaptarynyń buzylý faktileri de tirkelgen bolatyn. Qazir bul kemshilikter tolyqtai túzetildi.
Koronavirýs juqtyrǵandar joq
«Búginde ortalyqtaǵy balalardyń densaýlyq jaǵdailary turaqty. Eshkim koronavirýs juqtyrǵan joq. Qyzmetkerler arasynda da qaýipti dertke shaldyqqandar tirkelmegen. Bul qatań karantindik sharalardyń nátijesi. PTR tapsyrǵan ár qyzmetker osynda 15 kún boiy syrtqa shyqpai jumys isteidi. Sosyn olardy kelesi aýysymdaǵylar almastyrady», - dedi Sholpan Makasheva.
Tárbielenýshiler kúnine 5 ýaqyt tamaqtanady. Azyq-túlik ónimderiniń sapasyna qatań mán beriledi. Búginde ortalyqta 160-qa jýyq adam jumys isteýde. Tárbieshilerdiń kún tártibi mynadai:
7.00-7.30 – Balalardy uiqydan oiatý, jýyndyryp-kiindirý.
7.30-8.30 – Tańǵy as.
8.30-9.00 – Em-shara qabyldaýǵa jáne sabaqqa daiyndaý.
9.00-11.00 – Ár balamen jeke jumys (LFK, logoped, defektolog).
11.00-11.30 – Tańerteńgilik dárýmender berý.
12.30-13.00 – Túski as.
13.00-15.00 – Túski demalys (uiyqtatý).
15.30-16.00 – Uiqydan oiatý, tazalyq protsedýrasyn júrgizý.
16.00-16.30 – Tústen keiingi jeńil tamaqtandyrý.
16.30-17.30 – Tazalyq protsedýrasyn júrgizý.
19.00-19.30 – Keshki as.
19.30-21.00 – Tazalyq protsedýrasyn júrgizý.
21.00-21.30 –Keshki asqa qosymsha tamaqtandyrý.
21.30-22.00 – Uiqyǵa daiyndyq (dári berý, jýyndyrý)
22.00-07.00 – Túngi uiqy.
Olar dúisenbi saiyn balalardyń shash-tyrnaǵyn alady. Al seisenbide tárbielerýshilerdi jýyndyryp, tósek jabdyqtaryn aýystyrady.
«Eń bastysy, balalardyń amandyǵy men densaýlyq jaǵdaiynyń ońalýy. Baiqaǵanymyzdai, búldirshinderdiń kóńil-kúileri jaqsy. Salmaq qosyp, dertinen saýyǵyp jatqandar da bar eken. Bul eń negizgi kórsetkish. Jańadan alynǵan jabdyqtardyń sapasy da joǵary», - dedi qoǵamdyq keńes múshesi Olga Kýzovleva.
ShQO Jumyspen qamtý jáne áleýmettik baǵdarlamalardy úilestirý basqarmasynyń basshysy Jasulan Sársebaevtyń aitýynsha, Aiagózdegi áleýmettik ortalyqty Óskemen qalasyna kóshirý máseleni sheshpeidi. Sebebi balalardyń barlyǵy mundaǵy tárbieshilerdi ata-anasyndai qabyldaidy. Sondai-aq túrli diagnozy bar tárbielenýshilerge jańa ortaǵa beiimdelý qiynǵa túspek. Al ǵimarattyń tarlyǵy tek munda ǵana emes, elimizdegi túgel derlik osyndai mekemelerde sezilýde.
«Tórt balanyń óliminen soń ortalyqqa qatysty syni pikirler kóbeiip ketti. Onyń ishinde oryndysy da, orynsyzy da boldy. Biz árkez ashyqpyz. Kez kelgen suraqqa jaýap berýge daiynbyz. Biraq tyrnaq astynan kir izdegen durys emes. Syn obektivti bolýy kerek. Qazir ózderińiz kórgendei anyqtalǵan kemshilikter túzeldi. Áli de atqarar jumystarymyz az emes», - dedi ol.
Tergeý nátijesi qandai?
Oblystyq Politsiia departamentiniń Vedomstvoaralyq jedel-tergeý toby Prokýratýranyń basshylyq etýimen Balalar arnaiy áleýmettik kómek kórsetý ortalyǵynda tárbielenýshiler ólimi boiynsha sotqa deiingi tergeý júrgizgen edi. Tergeý barysynda eksgýmatsiia jasalyp, eki komissiialyq sot-meditsina saraptamasy júrgizildi. Komissiia quramyna balalar infektsionisi, kardiolog, anesteziolog-reanimatolog, neirohirýrg, pediatr, Nur-Sultan qalasynan gistolog-sarapshylar jáne sanitarlyq-epidemiologiialyq baqylaý komitetiniń mamandary qatysqan.
«Saraptama qorytyndysyna sáikes balalardyń ólimi ókpe fibrozy, ekijaqty irińdi bronh pnevmoniiasy siiaqty janama aýrýlardyń saldarynan bolǵan. Sondai-aq máiitterdi tekserý barysynda úsh balada dene jaraqaty anyqtaldy. Alaida bul jaraqattardyń tárbielenýshiler ólimine qatysy joq. Osyǵan bailanysty aýyr dene jaraqatyn alý faktisi boiynsha qylmystyq is bólek óndiriske shyǵarylyp, ary qarai tergeý amaldary júrgizilmek», – dedi ShQO PD bastyǵynyń orynbasary Eldos Zakimov.
Onyń aitýynsha, áleýmettik kómek kórsetý ortalyǵynda tárbielenýshilerge tiisti meditsinalyq kómek kórsetilmeý faktisi boiynsha qylmystyq is sotqa joldanǵan.
