Qarasha aiynyń sońyna deiin Almatyda jumys isteitin jastarǵa 249 jaldamaly páter beriledi. Almaty qalasynyń Turǵyn úi saiasaty basqarma basshysynyń orynbasary Aibek Saideldaev osylai dep málimdedi, – dep habarlaidy «Ult aqparat».
Almatyda jumys isteitin jastardan ótinishter men qujattardy qabyldaý úshin qalalyq ákimdik almaty-jastary.kz arnaiy sait ázirlegen bolatyn. Onda 30 qazannan 12 qarashaǵa deiin ótinishter qabyldandy. Jaldamaly baspana baǵdarlamasy aiasynda Alataý aýdanyndaǵy «Kókqainar» yqshamaýdanynan bir bólmeli 249 páter beriledi. Sait arqyly elektrondyq formatta 1244 ótinish qabyldandy.
«Basqarma 10 kún ishinde upailarǵa sáikes sanaq júrgizedi. Jaldamaly páter beriletin jastardyń tizimi bekitiledi. Bul tizimge upailardy esepteý kezinde ótinish berýshiniń kásibi, otbasylyq jaǵdaiy, jeke kásipkerlik qyzmeti, biýdjettik qyzmetterde jumys isteýi, shottarynyń jinaqtary eskeriledi. Baldary teń jaǵdaida ótinishti birinshi tapsyrǵan jastarǵa basymdyq beriledi. Osydan keiin saitta úmitkerlerdiń tolyq tizimi jariialanady. Alǵashqy 249 páterdi qarashanyń sońynda berýdi josparlap otyrmyz. Erejege sáikes, jas adamnyń turaqty jumys orny bolýy kerek. Sebebi, biz jastarǵa óz turǵyn úiin satyp alý úshin bastapqy jarna jinaýǵa múmkindik beremiz» dedi Aibek Saideldaev
Sonymen qatar, ol jumys isteitin jastarǵa jaldamaly baspana 5 jylǵa berilip, bir bólmeli páterdi jalǵa alýshylar aiyna 5 myń teńgeden tóleidi, kommýnaldyq qyzmetterge bólek tóleidi. Osy kezeńnen keiin páter bosatylýy kerek. Al jyl sońyna deiin Almaty qalasynda 1050 páterdiń kiltin tabystaý josparlanǵan.
