Almatyda jolaýshylar sanynyń azaiýyna bailanysty avtobýs júrgizýshileriniń jalaqysy qysqarmaidy. Bul týraly qalalyq Mobildilik basqarmasynyń basshysy Saǵyndyq Telibaev onlain-brifing kezinde aitty, dep habarlaidy QazAqparat.
«Koronavirýs infektsiiasynyń taralýyna jol bermeý úshin barlyq avtobýstarda dezinfektsiia jumystary júrgiziledi. Ony mamandanǵan kliningilik kompaniialar iske asyrady. Qoǵamdyq kólikter ár reisten keiin tolyǵymen zalalsyzdandyrylady», - deidi basqarma basshysy.
Sonymen qatar, ol jolaýshylardyń azaiýyna qaramastan júrgizýshilerdiń jalaqysy qysqarmaitynyn aitty.
«Jolaýshylar sanynyń azaiýy avtobýs júrgizýshileriniń jalaqysyna áser etpeidi. Olar karantin rejimine deiin qandai jalaqy alyp kelse, sol kólemde tólenedi. Júrgizýshiler tańerteń jumysqa kirispes buryn meditsinalyq tekseristen ótedi. Ol jerde qan qysymy, dene temperatýrasy tekseriledi. Eger sol kezde júrgizýshi densaýlyǵynyń nashar ekenin aitsa, birden jedel járdem shaqyrylady», - deidi Saǵyndyq Telibaev.
