2 qarashada Venada 4 adamǵa oq atqan mergen jalǵyz ózi áreket etken. Bul aqparatty Avstriia ishki ister ministri Karl Nehammer málimdedi.
Nehammerdiń sózine qaraǵanda, 3 qarashada Avstriia politsiiasy "terroristik uiymǵa qatysy bar" degen kúdikpen 18 ben 28 jas aralyǵyndaǵy 14 adamdy ustaǵan. Olardyń arasynda Avstriia azamattarymen qatar Bangladesh, Soltústik Makedoniia, Túrkiia, Resei azamattary da bolǵan.
Slovakiia biliginiń málimetinshe, shabýyldaýshy 2020 jyly jazda Slovakiiadan oq-dári satyp almaq bolǵan. Alaida qarý ustaý ruqsaty bolmaǵandyqtan ala almaǵan. Slovakiia biligi bar aqparatty Avstriianyń barlaý qyzmetine tapsyrǵanyn habarlady.
Vena ortalyǵynda adamdarǵa shabýyl jasaǵan 20 jastaǵy Kýitim Feizýlaida Avstriia jáne Soltústik Makedoniia pasporty bolǵan. Ol ustaý operatsiiasy kezinde atyp óltirildi.
Feizýlai byltyr sáýir aiynda "Islam memleketi" ekstremistik tobyna qosylýdy kózdep, Siriiaǵa ketpek bolǵany úshin 22 aiǵa bas bostandyǵynan aiyrylǵan. Biraq 8 ai ǵana túrmede otyryp, 2019 jyly jeltoqsan aiynda bosap shyqqan.
Avstriia ishki ister ministriniń aitýynsha, Feizýlai "deradikalizatsiia" baǵdarlamasynyń qatysýshysy bolǵan. Syrt kózge Avstriia qoǵamyna aralasyp ketkendei bolyp kóringenimen ekstremist ózinshe maqsat quryp, áreket etken.
