Foto: Inga Imanbaidyń Facebook-tegi paraqshasy
Bul týraly quqyq qorǵaýshy Inga Imanbai óziniń Facebook paraqshasynda jazdy. Onyń aitýynsha, merzimdi qyzmettegi sarbaz búgin, 27 qyrkúiekte tańǵy saǵat segizde Astanadan Stambulǵa ushyp ketken.
"Erbaian Stambýlǵa jolǵa shyqty. Ushaq búgin tańǵy segizde Astanadan ushty. Bul kúnge jetý de ońaiǵa soqqan joq. Toqtaýsyz kúres, talmai eńbekpen keldi. Bastysy, keńpeiil halqymyzdyń meiirimi men janashyrlyǵynyń jemisi.
Erbaian, myqty bol! Bul jartylai jeńis! Buiyrsa úlken jeńister alda. Seniń bar ómiriń alda. Aman-esen elge óz aiaǵyńmen oralýyńdy kútemiz", - dep jazdy Inga Imanbai.
Eske sala ketsek, shamamen on kún buryn Erbaiannyń ákesi Hamit Aimaǵambetov baspasóz konferentsiiasynda merzimdi qyzmettegi sarbazdy emdelýge qashan jiberetini týraly suraqqa jaýap bergen edi.
Ol kezde Hamit Aimaǵambetovtiń aitýynsha, qujattaryn jinaýda qiyndyqtar bolǵan jáne ulynyń jaǵdaiy bul áreketti júzege asyrýǵa múmkindik bermegen.
Aita keteiik, ótken jyldyń jeltoqsan aiynda Almaty qalasynyń 5571 áskeri bóliminde Ulttyq ulannyń merzimdi qyzmettegi sarbazy Erbaian Muhtar bas súiek-mi jaraqatyn alyp, komaǵa túsken. Áskeriler otbasyna onyń dárethanaǵa qulap, basyn plitaǵa urǵanyn habarlady. Týystary bul nusqamen kelispegen.
