Jergilikti ózin-ózi basqarýdyń jańa tujyrymdamasy ázirlenedi. Bul týraly QR Premer-Ministriniń birinshi orynbasary Álihan Smaiylov aitty, dep habarlaidy "Ult aqparat".
«Eldiń teńgerimdi óńirlik damýynyń jańa ádisteri jasalatyn bolady. Ol árbir naqty óńirdiń básekege qabilettilik basymdyǵyn ashý sharalaryn da qamtidy. Bul úshin 2030 jylǵa deiingi aýmaqtyq-keńistiktik damýdyń boljamdy syzbasyna tiisti ózgertýler engiziletin bolady», - dedi birinshi vitse-premer Úkimet úiindegi baspasóz máslihatynda.
Onyń atap ótýinshe, aýyldardaǵy ózekti infraqurylymdyq máselelerdi sheshýge baǵyttalǵan «Aýyl el besigi» jobasyn júzege asyrý jalǵasyn tabady.
«Jergilikti ózin-ózi basqarýdy jetildirý jáne «halyq qatysatyn biýdjetterdi» damytý aiasynda aýyldyq okrýgter biýdjetiniń qarjylyq múmkindikteri keńeitiledi. Jergilikti ózin-ózi basqarýdyń jańa tujyrymdamasy ázirlenedi. Atalǵan tujyrymdama aiasynda aýyl ákimderin tikelei sailaýdy engizý, jergilikti memlekettik basqarýdyń múliktiń quqyǵyn jáne máslihattardyń ókilettigin keńeitý boiynsha usynystar ázirlenedi», - dedi Úkimet basshysynyń birinshi orynbasary.
Sóz sońynda Álihan Smaiylov Memleket basshysynyń Joldaýynda eldiń naqty damý basymdyqtary belgilenip otyrǵandyǵyn, qoiylǵan mindetter tolyǵymen jáne ýaqtyly júzege asyrylatyndyǵyn basa aitty.
