Búgin Qazaqstan Respýblikasy Premer-Ministriniń orynbasary Eraly Toǵjanov basshylyǵymen otandyq óndiristiń 24 jyljymaly meditsinalyq keshenin elimizdiń tórt soltústik óńirindegi aýdandyq aýrýhanalardyń qyzmetkerlerine saltanatty tabystaý rásimi ótti, dep habarlaidy "Ult aqparat" primeminister.kz silteme jasap.
Vitse-premer E. Toǵjanov quttyqtaý sózinde Memleket basshysy men Úkimettiń atynan elimizdiń barlyq meditsina qyzmetkerlerine qajyrly eńbekteri úshin shyn júrekten alǵysyn bildirdi.
El basshylyǵy sapaly meditsinalyq kómek kórsetý úshin aýrýhanalardy zamanaýi meditsinalyq jabdyqtarmen jabdyqtaý boiynsha sharalar qabyldanǵanyn erekshe atap ótti. Jyljymaly meditsinalyq keshender otandyq avtokólik negizinde qurystyrylǵan jáne kóshpeli jaǵdaida azamattardyń densaýlyǵyn tekserýdiń keń spektrine arnalǵan.
Keshen tsifrlyq quraldarmen jabdyqtalǵan 7 mamandandyrylǵan kabinetten turady: jalpy qabyldaý kabineti, jalpy tájiribelik dáriger zonasy, taldaýlardy qabyldaý zonasy, dárihana pýnkti, fýnktsionaldyq diagnostika testileri, akýsher-ginekolog kabineti, sáýlelik diagnostika kabineti.
Sonymen qatar, mobildi meditsinalyq ortalyqta arnaiy qorǵasynmen qaptalǵan bólme ornatylǵan, onda rentgen jáne fliýorografiiany qaýipsiz jasaýǵa bolady. Júieniń basqa adamnyń járdemine muqtaj jandar úshin infraqurylymdyq júiemen jabdyqtalýy óte mańyzdy — pandýs-lift múmkindigi shekteýli adamdardy qabyldaýdy qoljetimdi etedi.
Atalǵan keshender aýdan ortalyqtarynan 100 shaqyrymnan astam qashyqtyqta ornalasqan aýyldyq okrýgterde meditsinalyq qyzmetterdi joǵary deńgeide kórsetýge múmkindik beredi. Aǵymdaǵy jyldyń 23 qazanyna deiin Qazaqstannyń óńirleri 100 jyljymaly meditsinalyq keshenmen qamtamasyz etiledi.
Óz kezeginde meditsina qyzmetkerleri memleket tarapynan jan-jaqty qoldaý kórsetilip kele jatqanyna zor rizashylyqtaryn bildirdi. Osyndai keshenderdiń arqasynda dárigerler aýyl turǵyndaryna sapaly kómek kórsetip, Qazaqstan azamattarynyń densaýlyǵy men ómir súrý uzaqtyǵyn jaqsarta alatynyn atap ótti.
