QR jer reformasy komissiiasynyń tóraǵasy B. Saǵyntaev myrzaǵa
jáne komissiia múshelerine
Jańa aýyl óndirisin qurý týraly Uly dala qyrandary qozǵalysynyń
USYNYSY
Qazaqtyń jany aýyldy saqtaýdyń birden-bir joly: «Jańa aýyl óndirisi» atty qurylymdy ashý bolyp tabylady.
Bizdiń aýyldaǵy qazaq qoǵamyna ońdy ózgerister men jańa silkinis qajet. Biz ózgeristi tómennen - qalyń áleýmetten, aldymen, aýyldaǵy qarapaiym halyq ortasynan bastaǵanymyz jón. Respýblika halqynyń 45,7 paiyzy aýyl, selolarda ómir súredi. Kóbiniń tirshiligi-tirshilik emes, ógiz ólmes, arba synbas jaǵdaida.
– Odan shyǵýdyń joly bar ma?
– Bar. Ol elimizdegi barlyq 7232 aýyldarda eń birinshi kezekte «Jańa aýyl óndirisin» qurý». Bul jańa qurylym iske asqan jaǵdaida aýylymyzdyń aiy ońynan týyp, juldyzy jarqyraityn bolady. Elbasynyń aýyldy túletýge arnalǵan bastamalaryn tolyǵymen qoldaimyz.
Adaldyq úshin aitýymyz kerek, el egemendigin alǵannan beri aýyl sharýashylyǵyn damytýǵa arnalǵan júzdegen baǵdarlamalar men sharalar qabyldanyp, iske qosyldy. Olar az da bolsa nátijesin berýde. Baqandai 3-jyldy aýylǵa arnadyq, Kolhoz, sovhozdardyń ornyna jekemenshik sharýa qojalyqtary, aktsionerlik uiymdar quryldy. Bizdiń saraptaýmyzsha alǵanda sharýa qojalyqtary óz missiialaryn oryndady. Endi olardyń ornyna jańa, tyń aýylsharýashylyq uiymy kelgenin durys dep sanaimyz.
Bul jerde aitatynymyz, aýylǵa jáne aýyl sharýashylyǵyna arnalǵan barlyq baǵdarlamalardy onyń ishinde, sharýa qojalyqtary, «Sybaǵa», «Aýyldaǵy aýyz sý» jáne taǵy basqa sharalardy qaita qarap, zertteý júrgizip, rettep, bir júiege, bir arnaǵa biz usynyp otyrǵan «Jańa aýyl óndirisine» toǵystyrý kerek. Bizdiń qozǵalystyń «Jańa aýyl óndirisi» baǵdarlamasyn ashýdaǵy negizgi kózdep otyrǵany: qazaqtyń altyn besigi aýyldy saqtap qalý; aýyl órkenietin qalyptastyrý; aýylda jastardy turaqtandyrý.
Shyndyǵyn aitaiyq, aýylymyz qartaiyp barady. Aýylda kúnnen-kúnge burynǵy jyldarmen salystarǵanda jalyndaǵan jastardyń qatary sirep barady. Bireýler qalaǵa bilim izdep ketse, endi bireýler eki qolǵa bir kúrek taýyp jumys isteý úshin ketedi. Sondyqtan da, «Uly Dala Qyrandary» qoǵamdyq mádeni-áleýmettik qozǵalysy aýyldy jaqsartyp, qaita túbegeili túletý úshin jańa qurylym qurý qajet dep esepteimiz. Onyń aty – «JAŃA AÝYL» óndiristik birlestigi. Ol burynǵy kolhoz turǵysynda qurylyp, jumys isteidi. Sonda aýylda jumys bolady, aýylǵa jan bitedi, adamdardyń turmys-tirshiligi ózgeredi.
Túiindep aitqanda, aýyldyń ósip-órkendeýi, órkenietke qol jetkizýi jańa qurylymdy quryp, onyń sharýasyn dóńgeletip úilestirip áketýde bolyp tur. Aýyl – qazaqtyń altyn besigi. Búgingidei órkenietke biz aýyl arqyly qol jetkizdik desek, qatelespegen bolar edik. Bárimiz aýyldan týylyp, aýyldan óstik. Óitkeni, aýyl ananyń aialy alaqanynan talai uly ǵalymdar, aqyndar men jazýshylar, memleket jáne qoǵam qairatkerleri, ministrler men ákimder túlep ushty.
Qurmetpen,
Quramynda júz myńnan astam músheleri bar
«Uly dala qyrandary» respýblikalyq
qozǵalysy teń tóraǵasy,
QR eńbek sińirgen qairatkeri, jazýshy
Sádibek Túgel
