Senator Áli Bektaev QR Premer-Ministri Asqar Maminniń atyna aýyl meditsinasynyń jai-kúiine qatysty depýtattyq saýal joldady, dep habarlaidy "Ult aqparat".
Depýtattyń aitýynsha, «Aýyl» partiiasynyń belsendileri men eriktileri 200-ge jýyq eldi mekendi aralap, jergilikti densaýlyq saqtaý mekemeleriniń múmkindikterimen tanysqan. Sonyń nátijesinde aýyldyq aýrýhanalardaǵy jaǵdai kúrdeli ekeni anyqtalǵan.
Depýtat aýyldyq eldi mekenderde turǵyndardy emdeýge beiimdelgen statsionarlardyń tapshylyǵyn sóz etti.
Sonymen qatar senator aýyldyq jerlerdegi qyzmet etip turǵan dárigerlik ambýlatoriialar men feldsherlik-akýsherlik pýnktterdiń materialdyq jaǵdaiynyń nasharlyǵyna toqtaldy.
Á. Bektaevtyń aitýynsha, aýyldarda qyzmet etetin dárihanalardyń tapshylyǵy sezilýde.
«Naryq talaptaryna sai aýyl turǵyndary tabysynyń tómendigine bailanysty aýyldyq jerlerde jekemenshik dárihanalar atymen joq. Al meditsina mekemelerin dári-dármekpen qamtamasyz etýdiń deńgeii óte tómen. Iaǵni, aýyldyqtardy dári-dármekpen qamtamasyz etý kúrdeli problemaǵa ainalyp otyr dep aitýǵa bolady», - dedi senator.
Depýtat aýyldaǵy ambýlatoriialar men feldsherlik-akýsherlik beketterde qyzmet isteitin dárigerlerdiń kásibi deńgeiiniń tómen ekenin, mamandardyń jetispeýshiligi baiqalatynyn da tilge tiek etti.
Osy máselelerdi aita kelip, senator halyq sany 3 myńnan asatyn árbir eldi mekende óziniń dárihanasy, jedel járdemi men perzenthanasy bar aýyldyq aýrýhanalardy qalpyna keltirýdi tez arada qolǵa alǵan jón degen usynysyn bildirdi.
«Qajet jaǵdaida meditsina qyzmetkerlerin turǵyn úimen qamtamasyz etýdiń de, kóshpeli dárihanalardy uiymdastyrýdyń da turaqty sharalaryn qarastyrǵan durys», - dedi Áli Bektaev.
