Aýyldarda 315 jańa mektep salynady. Bul týraly Úkimet otyrysynda QR Ulttyq ekonomika ministri Áset Erǵaliev aitty, dep habarlaidy QazAqparat.
«Bilim berýdiń sapasyn jáne qol jetimdiligin arttyrý aiasynda aýyldyq jerlerde 5 myń mektepti jańǵyrtý jáne 315 jańa mektep salý josparlanýda. Barlyq aýyl mektepteri bilikti pedagogtarmen qamtylatyn bolady. 3 jastan 6 jasqa deiingi balalar 100 paiyz mektepke deiingi tárbiemen jáne oqytýmen qamtylady», - dedi Áset Erǵaliev.
Onyń atap ótýinshe, aýyldarda sportpen ainalysý jáne shyǵarmashylyq úiirmelerin damytý úshin jaǵdai jasaý maqsatynda 1 719 sport jáne 748 mádeniet nysany salynyp, jańǵyrtylady. Densaýlyq saqtaý salasynda 1 095 nysan salý jáne jańǵyrtý aýyldyq jerlerdegi densaýlyq saqtaý júiesiniń sapasyn jáne qol jetimdiligin arttyrýǵa múmkindik beredi.
«Barlyq is-sharalar aýyl turǵyndarynyń ómir súrý deńgeiin jaqsartýǵa, tabysyn arttyrýǵa jáne aýyldyq aýmaqtardy damytýǵa jańa serpilis beredi», - dedi ministr.
