Aýyldy basqaratyn ákimder qala nemese aýdan ortalyqtarynda turmaýy kerek. Osyndai oidy QR Prezidenti Ákimshiliginiń basshysynyń orynbasary Málik Myrzalin alǵa tartty, dep habarlaidy QazAqparat.
«Zańnamada eshqandai tártip qarastyrylmaǵan. Sailaý komissiiasy qorytyndy shyǵarady, kandidatty tirkeidi, sodan soń sailanǵan ákim birden qyzmetine kirisedi. Demek búgin-erteń bolatyn is. Aýyl ákimderi de memlekettik qyzmetshi, sondyqtan olarǵa da talap ortaq. Bul sailaýda aýyl ákimin jergilikti halyqtyń ózi tańdaǵandyqtan, ol eldiń muń-muqtajymen tanys, ári halyqqa jaqyn bolady. Halyqta ózi sailaǵan adamdy jaqsy tanyǵandyqtan máselelerin ákimge tikelei jetkize alady, bul degenimiz ekijaqty iaǵni keri bailanys bar degen sóz», - dedi M. Myrzalin «Habar24» telearnasyna suhbat berý barysynda.
Onyń aitýynsha, el basqarýda halyqpen ózara qarym-qatynastyń mańyzy erekshe.
Sondai-aq, M. Myrzalin sailanǵan ákim sol aýylda turýy tiis degen oidy alǵa tartty. Málimdeýinshe, aýylda turǵan ákim jergilikti máselelerdi óz kózimen kórip, halyqtyń jaǵdaiymen tikelei tanys bolady.
«Buǵan deiin sailaýsyz taǵaiyndalǵan ákimder qalada nemese aýdan ortalyqtarynda turyp, aýyldy basqarǵanyna senimdimin. Endi aýyl halqy ózderi sailaǵan ákimniń olai isteýine jol bermeidi», - deidi ol.
