Foto: aikyn.kz
Aýyl jastary men turǵyndary mádeni diskriminatsiiaǵa ushyramaýy tiis. Senator Darhan Qydyráli óziniń depýtattyq saýalynda aýyldyq jerlerdegi mádeniet úileri men kitaphanalardy damytý qajettigi týraly aitty, dep habarlaidy "Ult aqparat".
Depýtattyń aitýynsha, aýyl turǵyndary men jastaryna demalys ýaqyttaryn tiimdi ótkizetin, ózderin damytatyn túrli úiirmeler men sektsiialar jetispeidi. Jumys istep turǵan 2 035 mádeniet úiiniń 770-i jáne 2 006 aýyldyq klýbtyń 608-i kúrdeli jóndeýdi qajet etedi. Olardyń keibiri tozǵan, al basqalary tótenshe jaǵdaiǵa ushyraǵan. Júiesiz ýrbanizatsiia mádeni immýniteti tómen marginal jastardyń qataryn kóbeitip otyr.
Senator sonymen qatar qazirgi kezde elimizde 3 891 kitaphana jumys isteitinin, onyń 79%-y aýyldyq jerde ekenin atap ótti. Alaida, olardyń kópshiligi eskirgen jáne materialdyq-tehnikalyq bazasy jetkiliksiz. Jergilikti atqarýshy organdar kóbinese «qaldyq qaǵidaty» boiynsha bóletin shamaly qarjy kitap qoryn toltyrýǵa jetpeidi.
«Qubylǵan zamanda qubyladan jańylmas úshin qundylyqtar qajet ekeni belgili. Biz «vandalizm kóbeidi, qatigezdik artty, aialdamany qiratatyn, jedel járdem júrgizýshisin uratyn júgensizdik qaidan shyqty, mádenietimiz nege tómendedi?» degen suraqty jii qoiamyz. Mádeniet úii joq jerde mádeniet qaidan bolsyn?! Aýylda mádeni infraqurylym bolmai, kreativti indýstriianynyń damýy qiyn. Kitaphanasy tozǵan, bas qosatyn mádeniet úii eskirgen, kino kórýge, kontsert tamashalaýǵa, sportpen ainalysýǵa jaǵdaiy joq aýyl jastary men turǵyndar sonda nemen ainalysady? Memleket basshysy Quryltaida táýlik boiy jumys isteitin kitaphana ashýdy armandaitynyn aitqan edi. Soǵan sáikes aýyl kitaphanalary salyna ma? Jalpy aýyldyń mádeni ómirin damytýǵa arnaiy baǵdarlama bar ma? Sizden joǵaryda kóterilgen máseleler boiynsha tolyq jazbasha jaýap berýdi suraimyz», - dedi Darhan Qydyráli.
