Aýyl turǵyndaryna vaktsina salýǵa erekshe nazar aýdarý kerek. Bul týraly QR Premer-Ministri Asqar Mamin aitty, dep habarlaidy "Ult aqparat".
«Qazirgi ýaqytta virýs juqtyrýdyń ósý qarqyny turaqtanyp keledi. Virýstyń reprodýktivtilik deńgeii azdap tómendep, 0,98 qurady. Aýrýhanalarda oryndar – 42 paiyzǵa, jansaqtaý bólimderi 28 paiyzǵa toly. 9 óńir «qyzyl aimaqta». Bul - Nur-Sultan, Almaty, Shymkent qalalary jáne Batys Qazaqstan, Aqmola, Qaraganda, Qyzylorda, Pavlodar, Jambyl oblystary. Búgingi kúni óńirlerge 2,3 mln astam vaktsina jetkizildi. 1,5 mln-ǵa jýyq adam vaktsinanyń birinshi komponentin jáne 350 myń adam ekinshi komponentin aldy. Mamyrda eki millionnan astam adamdy vaktsinamen qamtamasyz etýdi josparlap otyrmyz», - dedi Asqar Mamin Úkimet otyrysynda.
Onyń atap ótýinshe, vaktsinanyń qajetti kólemi bar. Sondyqtan vaktsinatsiialaýdyń osy qarqynyn tómendetpei, ony tek ósirý kerek.
«Halyqtyń koronavirýsqa qarsy vaktsinaǵa qajettiligin barynsha qamtamasyz etip, pandemiia deńgeiin tómendetý úshin barlyq is-sharalar iske asyrylýda. Aýyl turǵyndaryna vaktsina salýǵa erekshe nazar aýdarý kerek. Sonymen qatar vaktsina alǵandardyń sany artqanymen, azamattar belgilengen sanitariialyq normalardy qatań saqtaýdy jalǵastyrýy tiis», - dedi Úkimet basshysy.
