Aýyldyq aýrýhanalar úshin 9,5 mlrd teńgege dárilik zattar jáne meditsinalyq buiymdar satyp alyndy. Bul jaiynda Senat depýattarynyń resmi saýalyna orai QR Premer-Ministri Asqar Maminniń bergen jaýabynda aitylǵan, dep habarlaidy QazAqparat.
Úkimet basshysynyń atap ótýinshe, «Halyq densaýlyǵy jáne densaýlyq saqtaý júiesi týraly» Kodekstiń 233-baby 6-tarmaǵyna sáikes aýdan ortalyǵynan shalǵaidaǵy, dárihanalar joq eldi mekenderde dárilik zattar men meditsinalyq buiymdardy ótkizý meditsinalyq-sanitarlyq alǵashqy kómek kórsetetin densaýlyq saqtaý uiymdaryndaǵy jáne jyljymaly dárihana pýnktteri arqyly júzege asyrylady.
«Óńirler málimdegen qajettilikke sáikes ambýlatorlyq dári-dármekpen qamtamasyz etý úshin «SK-Farmatsiia» JShS 542 dárilik zattar jáne meditsinalyq buiymdar ataýyn 116,6 mlrd teńgege, onyń ishinde aýyl turǵyndary úshin – 30,7 mlrd teńge, statsionarlyq deńgei úshin – dárilik zattar jáne meditsinalyq buiymdardyń 1 018 ataýyn 110,6 mlrd teńge somasyna, onyń ishinde aýyldyq aýrýhanalar úshin 9,5 mlrd teńge somasyna satyp aldy», - dedi Asqar Mamin.
Premer-Ministrdiń aitýynsha, aýyldyq eldi mekenderdi dárilik zattarmen, meditsinalyq buiymdarmen qamtamasyz etý monitoringi, densaýlyq saqtaý uiymdaryn materialdyq-tehnikalyq jaraqtandyrý Qazaqstan Respýblikasynyń aýmaǵynda koronavirýstyq infektsiianyń taralýyna jol bermeý jónindegi vedomstvoaralyq komissiia deńgeiinde júrgiziledi.
