Qazaqstan azamattaryna da jerdi jekemenshikke berýge bolmaidy. Bul týraly Jer reformasy jónindegi komissiianyń 1-otyrysynda qoǵam qairatkeri Murat Ábenov aitty, dep habarlaidy "Ult aqparat".
«Sheteldikterge qatysty másele boiynsha Prezident barlyq jaýapkershilikti moinyna aldy. Jer sheteldikterge jalǵa da berilmeidi, satylmaidy da. Bárimiz qoldaimyz. Sol arqyly komissiianyń bir úlken jumysy sheshildi dep oilaimyn. Taǵy bir másele - bizdiń azamattarǵa jekemenshikke aýyl sharýashylyǵy jerlerin berý. Bul - negizgi máselelerdiń biri. Jeke ózim aýyl sharýashylyǵy jerlerin jekemenshikke berýge qarsymyn. Qarsy bolatyn sebebim, azamattardyń 99 paiyzy aýyl sharýashylyǵy jerin ielenbegen. Kezinde jer bólingende basy-qasynda bolmaǵan, oǵan qyzyqpaǵan. Sol azamattardyń 99 paiyzy jer máselesine aralasýy tiis», - dedi komissiianyń birinshi otyrysynda Murat Ábenov.
Sonymen qatar ol jalǵa jer berý naryǵyn damytý qajettigin atap ótti.
«Kóp elde jerdi jalǵa berý naryǵy bar. Jyldan-jylǵa baǵasyn belgilep otyrady jáne azamattar jalǵa berý arqyly tabys taýyp otyr. Menińshe bul - kóp memlekette qoldanystaǵy tiimdi júie. Bizge de sony paidalanýǵa bolady», - dedi ol.
