"Báiterek" ulttyq basqarýshy holdingi aýyl sharýashylyǵy tehnikasyn jeńildetilgen lizingke berý baǵdarlamasyn iske qosady, - dep habarlaidy "Ult aqparat" Indýstriialyq damý qoryna silteme jasap.
"Aýyl sharýashylyǵy tehnikasyn jeńildetilgen lizingke berý baǵdarlamasyn iske asyrý úshin 40 milliard teńge bólinedi, onyń 30 millirad teńgesin "Ónerkásipti damytý qory" AQ "Jasyl Damý" (ÓKM operatory) AQ qarajatynan jáne 10 millirad teńgesin "QazAgroQarjy" AQ kapital naryǵynan tartady", - delingen habarlamada.
Baǵdarlamaǵa qatysý úshin ótinimderdi qabyldaý "QazAgroQarjy" AQ-nyń barlyq filialynda 5 tamyzda bastalady.
Ótinimderdi qaraýdy, sondai-aq otandyq óndiristegi aýyl sharýashylyǵy tehnikasyn lizingke berýdi «QazAgroQarjy» AQ kelesi sharttarda júzege asyrady:
1. lizing merzimi – 10 jylǵa deiin;
2. syiaqy mólsherlemesi – jyldyq 6%;
3. lizing boiynsha bastapqy jarna (avanstyq tólem) – lizing nysanasy qunynyń 0%;
4. negizgi boryshty óteý boiynsha jeńildik kezeńi – 1 jyl;
5. qarjylandyrý kólemi – bir lizing alýshyǵa 205 000 000 (eki júz bes million) teńgeden jáne bir lizing alýshyǵa aýyl sharýashylyǵy tehnikasynyń úsh birliginen artyq emes.
Sondai-aq qarjylandyrýdyń bir lizing alýshyǵa eki jyldyq kezeń ishinde bir retten jii emes usynylýy mańyzdy shart bolyp tabylady.
Baǵdarlamaǵa kelesi otandyq óndiristegi ózdiginen júretin aýyl sharýashylyǵy tehnikalary qatysady:
• LOVOL, DEUTZ FAHR, TURAN, KIROVETs, BELARÝS, RSM, YTO, CLAAS XERION, DONG FENG, WUZHENG markaly traktorlar;
• ESSIL, VECTOR, ACROS, TORUM, CLAAS TRION, DEUTZ FAHR markaly astyq jinaityn kombaindar (kúrish kombaindary);
• Súrlem jinaityn kombaindar: Jemshóp jinaityn joǵary ónimdi kombain (JJK), Jemshóp jinaityn ózdiginen júretin kombain (JÓK).
Aýyl sharýashylyǵy tehnikasyn óndirýshilerdiń tizimine: «AgromashHolding KZ» AQ, «Qostanai traktor zaýyty» JShS, «Qazaqstan Agro innovatsiialyq korporatsiiasy» JShS, «SemAZ» JShS, «Kazrost Engineering Ltd.» JK, «ST ESEMBLI» JShS, «KazKioti» JShS, «MTZ-Qazaqstan mashina jasaý zaýyty» JShS kiredi.
"Aýyl sharýashylyǵy tehnikasyn jeńildetilgen lizingke berý baǵdarlamasy shegindegi qarjylandyrýdyń revolverlik sipatta bolatynyn, iaǵni qoldanystaǵy lizingti óteýden túsetin tólemderdiń jańa qarjylyq lizing sharttaryn jasasýǵa qaita jiberiletinin aita ketý kerek. Baǵdarlamanyń ózi 20 jylǵa eseptelgen", - delingen habarlamada.
