Elimizde aýyl sharýashylyǵy salasynda nelikten gastarbaiterler kóp. Bul suraqqa QR Ishki ister ministrligi Kóshi-qon komiteti tóraǵasynyń orynbasary Sabyrjan Seiitjanov jaýap berdi, dep habarlaidy QazAqparat.
«Bul jerde másele jumys kúshiniń jetispeýinen emes, bizdiń azamattar aýyl sharýashylyǵynda jumys istegisi kelmeidi, onyń ústine jalaqysy az. Eldegi jumyssyz azamattardyń ózi jalaqysyn azsynyp, bul salada jumys istegisi kelmeidi. Al Ózbekstan azamattary aýyl sharýashylyǵynda qýana jumys isteýge daiyn tur», - dedi Seiitjanov OKQ-de tilshilerdiń suraǵyna jaýap bere otyryp.
Buǵan deiin Kóshi-qon komitetiniń ókili, sheteldik eńbek migranttarynyń zańdy túrde qalai jumys istei alatyny týraly aityp berdi.
Odan bólek, atalǵan baspasóz máslihatynda Azamattyǵy joq máseleler jónindegi óńirlik keńesshi, BUU Bosqyndar isteri jónindegi joǵary komissar basqarmasynyń Ortalyq Aziia boiynsha ókili Roman Marin Qazaqstanda azamattyǵy joq 7 myń adamnyń tirkelgenin málim etti.
«Biz Qazaqstan Respýblikasynda ár adamnyń jeke quqyǵy qorǵalyp, onyń azamattyǵyn zańdastyrýda barlyq múmkindik qarastyrylǵanyna senimdimiz. Ótken jyldyń sońynda Qazaqstan aýmaǵynda azamattyǵy joq 7 myń adam tirkeldi. Aityp ótken jón, «azamattyǵy joq» mártebesin resmi túrde alǵan adam, zań aiasynda óz quqyǵyn qorǵap, azamattyǵy bar adamdarmen birdei múmkindikterdi qoldana alady. Qazaqstanda bul baǵyttaǵy jumystardy IIM quzyrly jáne úkimettik emes uiymdarmen birlesip atqaryp jatqan eńbegi óz jemisin berip jatyr. Biz de óz tarapymyzdan azamattyǵy joq adamdarǵa jan-jaqty qoldaý kórsetýge ázirmiz», - deidi ol.
