Nur-Sultan qalalyq soty Aýyl sharýashylyǵy ministrliginiń Agroónerkásiptik keshendegi memlekettik inspektsiia komitetiniń burynǵy basshysy E. Ainabekovti aqtap shyǵardy, dep habarlaidy "Ult aqparat".
E. Ainabekov komitet tóraǵasy qyzmetinde bolǵan kezde laýazymdyq ókilettikterin asyra paidalanǵany úshin aiyptalǵan bolatyn. Naqty aitsaq, 2017 jyldyń aqpan-sáýir ailarynda Memlekettik satyp alý konkýrsynyń qorytyndysy boiynsha Jambyl jáne Ońtústik Qazaqstan (Túrkistan) oblystarynyń aýmaǵyndaǵy egis daqyldaryn himiialyq ýlaǵysh zattarmen óńdeitin merdiger retinde jeke kásipkerlik nysan jeńimpaz dep tanylǵan bolatyn. Merdiger jumysty sapasyz oryndap, tehnikany der kezinde jetkizbeýi saldarynan óńirge «marokko shegirtkesi» qaptaǵan.
Tergeý kezinde E. Ainabekovke osy keleńsizdiktiń izin jabý úshin «Fitosanitariia» RMK basshysy Tólebaevty jumysty kesheýildetken merdigerge shegirtkege qarsy ý shashatyn tehnika usynýǵa májbúrledi degen aiyp taǵylǵan. Tergeý nusqasy boiynsha sonyń saldarynan atalmysh respýblikalyq memlekettik kásiporyn 520 855 teńge ziian shekken. Sondai-aq komitettiń eks-basshysy jaýapkershiligi shekteýli seriktestikti shegirtkege qarsy ýly himikattardy tegin berýge májbúrlegen. E. Ainabekov osy zańsyz tapsyrmasy arqyly seriktestikti 18,1 mln teńge shyǵynǵa batyrǵan.
«Buǵan qosa Ainabekov mamandandyrylǵan aýdanaralyq sot merdigerdi josyqsyz oryndaýshy retinde tanyǵanyn bile turyp, kelisimshart qunyn ulǵaitý týraly qosymsha qujat rásimdeý arqyly 30 040 695 teńge somasynda biýdjet qarajatyn zańsyz tóledi dep aiyptalǵan bolatyn. Nur-Sultan qalalyq sotynyń qylmystyq ister jónindegi sot alqasynyń 2021 jylǵy 3 tamyzdaǵy úkimimen Ainabekov óziniń áreketterinde qylmystyq quqyq buzýshylyq quramynyń bolmaýyna bailanysty taǵylǵan aiyp boiynsha aqtaldy», - dep jazylǵan sottyń baspasóz qyzmeti taratqan aqparatta.
Resmi málimette ziiankeske qarsy ý shashatyn tehnikanyń ýaqtyly jetkizilýin jáne alańdardy shegirtkege qarsy óńdeý sharalarynyń bastalýyn baqylaý komitetke baǵynyshty aýmaqtyq inspektsiiasy basshylyǵynyń mindetine kirgendikten osyndai sheshim shyǵarylǵany aitylǵan.
«Sot talqylaýy kezinde «marokko shegirtkesiniń» Jambyl oblysynyń aýmaǵynda jappai taralýynyń naqty sebepteri anyqtaldy. 2016-2017 jyldarǵa dóp kelgen tabiǵi tsiklderden týyndaǵan biologiialyq belsendilik, shegirtke taralýy yqtimal aýdandarda himiialyq óńdeý jumystaryn júrgizýge qolaily aýa raiynyń bolmaýy, sondai-aq vedomstvonyń qaramaǵyndaǵy diagnostika ortalyǵynyń 2016 jyly shegirtkelerdiń taralý múmkindigin durys boljamaýy ziiankesterdiń bas kóterýine sebepker bolǵan. 2016 jyly atalmysh ortalyqty Ainabekov basqaryp, keiin komitet basshylyǵyna aýysty. Biraq ol boljam jobasyna óńirlerden alynǵan derekter negizinde qol qoidy», - dep jazady qalalyq sottyń baspasóz qyzmeti.
Sottyń uiǵyrymy boiynsha, aiyptaýshy tarap Ainabekovtiń arnaiy tehnika men ýly himikatty jetkizý kezinde zardap shekti dep kórsetilgen RMK men JShS basshylyǵyna qysym kórsetý faktisin dáleldei almaǵan. Iaǵni, RMK tehnikasyn direktor kásiporyn Jarǵysy boiynsha erikti túrde, merdigermen arada jasalǵan yntymaqtastyq týraly shart negizinde usynǵan kórinedi.
Al mamandandyrylǵan aýdanaralyq sot sheshimine qaramastan, qosymsha kelisimshart jasaýǵa memlekettiń ekonomikalyq jáne ekologiialyq múddelerine qaýip tónýi túrtki bolǵany aitylýda. Iaǵni, shegirtkelerdiń tez taralýyn toqtatý úshin osyndai sharaǵa barýǵa májbúr bolǵan.
«Ainabekovtiń qosymsha kelisimder jasaýy jáne qosymsha qarjy bólgizýi zańǵa sáikes bolǵanyn AShM komitetiniń zańsyz bólindi degen aqshany óndirip alý sharasynan bas tartýy negiz boldy. Óitkeni qosymsha bólingen aqshaǵa tiisti óńdeý jumystary júrgizilgen. Atalǵan óńirlerde qosymsha óńdeý jumystary júrgiziletinin ministrliktegi basshylar da bilgen. Muny burynǵy vitse-ministr Rahymbekov rastady. Ainabekovtiń ústinen qozǵalǵan 1,5 jyldyq tergeý onyń merdiger uiymnyń nemese onyń basshysy Qalmuratovtyń paidasyna zańsyz is-áreketter jasaǵanyn anyqtai almaǵan», - dep jazylǵan sot málimetinde.
Iaǵni, Qylmystyq kodekstiń 361 jáne 362-baptarynda kórsetilgen zań buzý faktilerin aiyptaýshy tarap dáleldei almady.
Eks-sheneýnikti aqtaǵan úkim zańdy kúshine endi.
