"Aýyl" partiiasy aldaǵy kezekten tys prezident sailaýyna Tóleýtai Raqymbekovti usynyp, kandidatýrasyn biraýyzdan qoldady, dep habarlaidy Sputnik Qazaqstan tilshisi.
Nur-Sultan qalasynda "Aýyl" partiiasynyń kezekten tys XV sezi ótti. Sezdiń kún tártibinde aldaǵy kezekten tys prezident sailaýyna partiia atynan kandidatýra usyný máselesi qaraldy.
"Aýyl" partiiasynyń tóraǵasy Áli Bektaev partiia merziminen buryn prezident sailaýyna qatysatynyn málimdep, prezidenttikke úmitker retinde Tóleýtai Sataiuly Raqymbekovti usyndy. Bektaev Tóleýtai Raqymbekov qoǵamǵa jaqsy tanys, melekettik qyzmette óziniń ultjandylyǵyn kórsetip, elge degen adaldyǵymen tanylǵan azamat ekenin atap ótti.
Partiia músheleri prezident laýazymyna úmitkerge túrli suraqtar qoidy, sonyń biri qazaq tili men jerge qatysty boldy.
"Qazaqstanda qazaq tili birinshi orynda turýy kerek", - dedi kandidat.
Sondai-aq, jerdi 49 jylǵa jalǵa berýdi quptaitynyn, sheteldikterge satylmaý kerek ekenin aitty. Jerdi tiimdi jáne durys paidalaný kerek degen pikirde.
Tóleýtai Raqymbekov týraly ne bilemiz?
Tóleýtai Sataiuly Raqymbekov 1964 jyly 19 shildede Qaraǵandy oblysy, Jańaarqa aýdany Atasý kentinde týǵan.
1986 jyly Qazaq aýyl sharýashylyǵy institýtyn injener-mehanik mamandyǵy boiynsha támamdady. Bóketov atyndaǵy Qaraǵandy memlekettik ýniversitetin zańger mamandyǵy boiynsha bitirgen. Ekonomika ǵylymdarynyń doktory.
Eńbek joly
Eńbek jolyn 1987 jyly Qazaq aýyl sharýashylyǵy institýtynyń aspirantýrasyn bitirgennen keiin, Qaraǵandy oblystyq Jańaarqa aýdandyq aýyl sharýashylyǵy tehnikalary birlestiginde injener bolyp bastaǵan.
1992 jyldan beri kásipkerlikpen ainalysqan.
1999-2001 jyldary – Sátbaev qalasy ákiminiń orynbasary;
2001-2002 jyldary – Jezqazǵan memlekettik ýniversitetiniń dotsenti;
2002-2006 jyldary Qazaqstannyń aýyl sharýashylyǵy ministrliginde basqarma basshysy, departament direktory sekildi túrli basshylyq qyzmetter atqardy;
2006-2007 jyldary – Kólik jáne kommýnikatsiia ministrligi kólik saiasaty jáne halyqaralyq yntymaqtastyq departamentiniń direktory;
2007-2009 jyldary – "QazAgroInnovatsiia" AQ prezidenti;
2009 jyldyń naýryzynan 2009 jyldyń qarashasyna deiin – premer-ministr orynbasarynyń keńesshisi;
2009-2011 jyldary – Qaraǵandy oblysy ákiminiń orynbasary;
2017 jyldyń naýryzy men 2017 jyldyń shildesi aralyǵynda aýyl sharýashylyǵy vitse-ministri boldy.
2019 jyldyń sáýir aiynan beri – "Ulttyq agrarlyq ǵylymi-bilim berý ortalyǵy" KeAQ basqarma tóraǵasy.
Marapattary
"Qurmet" ordenimen, túrli medaldarmen jáne qurmet gramotasymen marapattalǵan.
Otbasylyq jaǵdaiy
Úilengen, eki qyzy bar.
Kezekten tys prezident sailaýy
Qazaqstan prezidenti Qasym-Jomart Toqaev 9 sáýirde el halqyna úndeý jasap, elde kezekten tys prezident sailaýy ótetinin jariialady. Memleket basshysy sailaýdy 2019 jyldyń 9 maýsymyna belgiledi.
Prezidenttikke kandidattardy usyný 28 sáýir saǵat 18:00-ge deiin jalǵasady. Úmitkerlerdi elimizde tirkelgen saiasi partiialar men respýblikalyq qoǵamdyq birlestikter usyna alady. Ár kandidat 118 140 senimdi sailaýshynyń qolyn jinaýy tiis. Kandidattardy tirkeý 11 mamyrǵa deiin jalǵasady.
Kezekten tys prezident sailaýyna úkimet rezervinen 9,4 milliard teńge bólinetin boldy. Qarjynyń negizgi bóligi respýblika boiynsha qurylatyn 10 myń sailaý ýchaskesiniń jumysyn uiymdastyrýǵa baǵyttalmaq.
Kandidattarǵa qoiylatyn talaptar
Prezidenttikke kandidat týmysynan Qazaqstan azamaty, qyryq jasqa tolǵan, memlekettik tildi meńgergen, sońǵy 15 jyl boiy Qazaqstanda turatyn jáne joǵary bilimi bar respýblika azamaty bolýy tiis.
Buǵan qosa, prezident bolyp sailaný úshin azamattyń memlekettik qyzmette nemese sailanbaly memlekettik laýazymdarda keminde 5 jyl jumys tájiribesi, sondai-aq belsendi sailaý quqyǵy bolýy tiis.
Sondai-aq, Qazaqstan prezidenttigine kandidattar 107 túrli júike dertine tekseriledi.
