«Aýyl» halyqtyq-demokratiialyq patriottyq partiiasynyń kezekten tys XVIII sezinde Májilis depýtattyǵyna kandidattar tizimi bekitildi, dep habarlaidy "Ult aqparat".
«Biylǵy sailaýdyń erekshelegi úmitkerlerdiń úshten biri jastar men áielder bolýy shart. Bul kriteriilermen óz basym tolyq qosylamyn. Jastardy da, qyz-kelinshekterdi de túrli bilik salasyna aralastyrýdy kóbeitý maqsatynda jasalyp otyr. Ózderińiz bilesizder, bizde barlyq óńirde konferentsiialar ótti. Solardyń barlyǵynda da tiisti deńgeidegi máslihatqa kandidattar usynyldy. Partiialyq tizimder tirkeldi», - dedi sezd barysynda partiia tóraǵasy Áli Bektaev.
Onyń aitýynsha, «Aýyl» partiiasynan máslihattardyń depýtattyǵyna 654 kandidat tirkelgen.
«Búgin Májiliske usynylatyn kandidattardyń barlyǵy sarapshylarmen, óńir ókilderimen, saiasi keńes, tóralqa múshelerimen talqylanyp, qoldaý tapty. Endi sezd qaraýyna usynylyp otyr», - dedi Áli Bektaev.
Osydan keiin «Aýyl» partiiasy ortalyq apparatynyń basshysy Qýanysh Seiitjanov Májilis depýtattyǵyna kandidattar tizimin jariia etti. Tizimge 19 adam kirip otyr.
Olar:
1. S.Seifýllin atyndaǵy Qazaq agrotehnikalyq ýniversitetiniń rektory Qairat Aitýǵanov;
2. QR Mádeniet jáne sport ministrligi Týrizm indýstriiasy komiteti basqarmasynyń jetekshisi Qarlyǵash Aralbekova;
3. «Nomad» sharýa qojalyǵynyń tóraǵasy Nikolai Arsiýtin;
4. Qazaqstan jýrnalisteri kásipodaǵynyń basshysy Zeiin Álipbekov;
5. «Zyliqa» sharýa qojalyǵynyń tóraǵasy Nurjigit Begaly;
6. «Astana» aýyl sharýashylyǵy ónerkásibi kooperatsiiasy» AQ basqarma tóraǵasy Talǵat Zeinýllin;
7. QR Qazaqstan Jazýshylar odaǵy Nur-Sultan qalalyq filialynyń tóraǵasy Dáýletkerei Kápuly;
8. S.Seifýllin atyndaǵy Qazaq agrotehnikalyq ýniversitetiniń departament direktory Áigerim Kókeeva;
9. «Qazaq ádebieti» gazetiniń bas redaktory Dáýren Qýat;
10. «Innovatsiialyq tehnologiialar akademiiasy» JShS-niń bas direktory Bolatbek Qystaý;
11. QR AShM Agroónerkásiptik keshendegi memlekettik inspektsiia komitetiniń Mańǵystaý oblystyq aýmaqtyq inspektsiiasynyń basshysy Kenjeǵali Mashyryqov;
12. Ekonomika, qarjy salasynyń bilikti mamany Almas Muhametov;
13. «Aýyl» partiiasy tóraǵasynyń birinshi orynbasary Tóleýtai Rahymbekov:
14. Ekonomika jáne biznes magistri Aidar Sattarov;
15. QR BǴM ǴM Ekonomika institýtynyń direktory Ázimhan Satybaldin;
16. «Mámile» aýyzeki qazaq tili klýbynyń negizin qalaýshy Qanat Tasybekov;
17. Ekonomika ǵylymdarynyń doktory Rabiǵa Toqseiitova;
18. «Ádemi-ai» kompaniiasynyń quryltaishysy Bahargúl Tólegen;
19. «Azimýt» JShS direktory Valentin Hadanovich.
