Aýyldyq jalpy bilim beretin tolyq jinaqtalǵan mektepterdiń jan basyna qarjylandyrýǵa kóshýi respýblikalyq biýdjetten edáýir qarajat bólýdi talap etedi. Bul jaiynda QR Premer-ministriniń orynbasary Eraly Toǵjanovtyń Májilis depýtattarynyń saýalyna bergen jaýabynda aitylǵan, dep habarlaidy QazAqparat.
«Jan basyna qarjylandyrý ádistemesine sáikes 2020 jylǵy 1 qyrkúiekten bastap respýblikanyń 1 595 qalalyq tolyq jinaqtalǵan mektebinde tolyq aýqymdy jan basyna qarjylandyrý engizildi jáne eńbek aqy tóleý, kommýnaldyq qyzmetter, kúrdeli shyǵystar, bailanys qyzmetteri, sondai-aq muǵalimder úshin yntalandyrý qoryn qalyptastyrýǵa arnalǵan shyǵystardy qamtidy. 2013-2017 jyldar aralyǵynda 5 óńirdiń (Aqmola, Aqtóbe, Almaty, Shyǵys Qazaqstan, Túrkistan oblystarynda) 30 aýyldyq mektebinde jan basyna qarjylandyrýdy synaqtan ótkizý júrgizilgenin atap ótý qajet. Pilottyq joba qorytyndysy boiynsha jan basyna normativtik qarjylandyrý engizilgen aýyldyq mektepterde synyptardyń tómen tolymdylyǵyna bailanysty olardyń jumys isteýi, onyń ishinde qyzmetkerlerdiń jalaqysy boiynsha shyǵystar ótelmedi», - dedi Premer-ministrdiń orynbasary.
Máselen, onyń atap ótýinshe, jobalyq qýaty 120 oryndyq aýyldyq mektep tolymdylyǵy shamamen 80 adamdy quraidy. Eger smetalyq ustaý kezinde qarjylandyrý somasy jylyna 64 mln teńge bolsa, onda jan basyna normativtik qarjylandyrý kezinde qarjylandyrý kólemi 36,2 mln.teńgei (56,5 paiyzǵa kem) qurady. Bul rette, mekteptiń jumys isteý shyǵystary ózgerissiz qaldy.
«Qazirgi ýaqytta Bilim jáne ǵylym ministrligi aýyldyq jalpy bilim beretin tolyq jinaqty mektepterge tiisti túzetýleri bar ádisteme jobasyn (aýyldyq jerdegi jumysy úshin qosymsha aqy) daiyndady. Bul rette, aýyldyq jalpy bilim beretin tolyq jinaqtalǵan mektepterdiń jan basyna qarjylandyrýǵa kóshýi respýblikalyq biýdjetten edáýir qarajat bólýdi talap etetinin atap ótken jón. Óitkeni kóshý kezinde barlyq mektepterdi qarjylandyrý kólemin teńestirý júzege asyrylatyn bolady. Máselen, qalalyq tolyq jinaqty mektepterde ǵana jan basyna qarjylandyrýdy engizý respýblikalyq biýdjetten 213,6 mlrd teńge somasynda qosymsha qarjylandyrýdy talap etti (2021 jylǵa – 70,3 mlrd teńge; 2022 jylǵa – 73,1 mlrd teńge; 2023 jylǵa – 70,2 mlrd teńge). Osylaisha, respýblikalyq biýdjet qarajatyn tiimdi paidalaný jáne ysyrapshyldyqqa jol bermeý maqsatynda aýyldyq jalpy bilim beretin tolyq jinaqty mektepterdi jan basyna qarjylandyrýǵa kóshirý máselesi bilim berý salasyndaǵy quzyretti aýdandyq deńgeiden oblystyq deńgeige bergennen keiin qaralatyn bolady», - dedi Eraly Toǵjanov.
