QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda turǵyndardy keń jolaqty internetpen qamtamasyz etý máselesi qaraldy, dep habarlaidy "Ult aqparat".
Atqarylyp jatqan jumystar týraly tsifrlyq damý, innovatsiialar jáne aeroǵarysh ónerkásibi ministri B. Mýsin, «Qazaqtelekom» AQ basqarma tóraǵasy Q. Esekeev, «Transtelekom» AQ basqarma tóraǵasy E. Adaibekov, sondai-aq «Beeline Kazahstan» bas atqarýshy direktory E. Nastradin baiandady.
Premer-ministrdiń aitýynsha, «Tsifrlyq Qazaqstan» memlekettik baǵdarlamasyna sáikes elimizde aýyldyq eldi mekenderde talshyqty-optikalyq bailanys jelilerin salý jáne internetke mobildi qoljetimdilikti qamtamasyz etý boiynsha jobalar iske asyrylýda. Qazirgi kezde internetke keńjolaqty qoljetimdilikpen 6 459 aýyldyq eldi mekenniń 4 751-i qamtamasyz etildi (aýyl halqynyń 97,8%-y). Osy jyldyń qorytyndysy boiynsha 5,2 myńnan asa aýyl — elimizdegi aýyl halqynyń 99%-y úshin keń jolaqty internet qoljetimdi bolady.
«Internetke keń jolaqty qoljetimdilikti damytý máseleleri elimizdiń damýy úshin strategiialyq mańyzǵa ie. Aýyldardy keń jolaqty internetke qosý jónindegi biylǵy jylǵa arnalǵan barlyq josparlar merziminde iske asyrylady», — dedi Mamin.
Úkimet basshysy ákimdikterge KJQ jobalary boiynsha jabdyqtar ornatý úshin ýchaskeler bólý rásimderin jedel júrgizýdi, tsifrlyq damý ministrligine ákimdiktermen birlesip, halyq sany 250 adamnan az aýyldardy sapaly internetpen qamtamasyz etýdiń jospar-kestesin ázirleýdi tapsyrdy.
Premer-Ministr mektep oqýshylary men stýdentterdi qashyqtan oqytýǵa bailanysty óte ózekti bolyp otyrǵan internet sapasyn edáýir arttyrýdyń mańyzdylyǵyn atap ótti. Ol úshin tehnika satyp alynýda, bailanys jáne internet qyzmetteriniń sapasyn baqylaýǵa arnalǵan barlyq resýrstar bar.
«Árbir turǵyn úi men uiymda ornalasqan jerine qaramastan, sapaly internet pen bailanys bolýy kerek. Sondyqtan naqty talaptardy belgilep, tiisti jabdyqty ornatý máselelerin pysyqtaý qajet. Tsifrlyq damý ministrligi indýstriia ministrligimen birlesip, atalǵan máselelerdi sheshýi kerek», — dedi Mamin.
Tsifrlyq damý ministrligine bilim ministrligimen, «Atameken» UKP-men birlesip, naryqtyń áleýetti qajettiligin eskere otyryp, AT-mamandardy daiarlaý máselelerin pysyqtaý tapsyryldy.
