Koronavirýstyń ekinshi tolqynynda aýyl turǵyndary qysyltaiań jaǵdaiǵa tap bolady. Bul týraly «Aýyl» halyqtyq-demokratiialyq patriottyq partiiasy ortalyq apparatynyń jetekshisi Qýanysh Seiitjanov aitty, dep habarlaidy QazAqparat.
«Jalpy, epidemiologiialyq zańdylyqqa sáikes, indet qalaǵa qaraǵanda aýylda kóp taramaýy tiis. Óitkeni, aýylda halyq tyǵyz qonystanbaǵan, úlken ǵimarattar, úlken óndiris nysandary joq. Biraq, bizde kerisinshe jaǵdai oryn aldy. Volonterlerimiz ben belsendilerimizdiń baiqaýynsha, aýyldyq jerlerde kóbine turǵyndary vahtalyq ádispen úlken óndiris oryndaryna baryp jumys isteitin aýyldarda koronavirýs indeti órship ketken. Sondyqtan qazirden bastap osy úlken óndiris oryndarynda, qurylys kompaniialarynda sanitarlyq baqylaý men aldyn alý sharalaryn kúsheitpesek, onda kúzde bolady-aý degen koronavirýs indetiniń ekinshi tolqynynda aýyl turǵyndary qysyltaiań jaǵdaiǵa tap bolady», - deidi Qýanysh Seiitjanov.
Onyń atap ótýinshe, koronavirýs indetiniń birinshi tolqyny kezinde aýyldaǵy aǵaiyn óz qotyryn ózi qasyp, sharasyzdyqtan em-domdy úide alýǵa májbúr boldy. Sonymen qatar kúzgi oraq kezinde astyq bastyrý jumysyna jumyldyrylǵan jumysshylardyń aýyryp qalǵan jaǵdailary kezdesedi. Munyń da aldyn alý qajet.
«Áitpese, keler jyly nansyz qalýymyz múmkin. Aýyl - memleketimizdiń azyq-túlik qaýipsizdiginiń kepili. Sondyqtan qazirden bastap bul máselelerdi ótkir qozǵap, tiisti jerlerge jetkizýimiz qajet. Elimizdiń 14 óńirindegi 200-ge jýyq aýylǵa júrgizgen monitoringimizdiń negizinde Úkimetke usynys jasaimyz. Eń aldymen bul usynysta aýyldarda jabylyp qalǵan aýrýhanalar, ambýlatoriialar, feldsherlik-akýsherlik pýnkterdi memleket esebinen qaitadan ashýǵa basa mán beremiz. Ol - kezek kúttirmeitin másele. Osy jyldan bastap kirisip, buryn qalyp qoiǵan ǵimarattardy qalpyna keltirý qajet. Tipti, qazirden bastap kei aýyldarda aýrýhana qurylysyna kirisken jón. Óitkeni, 2-3 myń turǵyny bar aýyldarda jalǵyz feldsher ne bitiredi?», - deidi partiianyń apparat jetekshisi.
Sonymen qatar ol koronavirýs indetin juqtyryp alǵan aýyl turǵyndary PTR-testileýden de óte almaitynyn aitty.
«PTR-test negizinen úlken aýdan ortalyqtaryndaǵy provizorlyq aýrýhanalarda bolǵan. Biraq bárinde birdei bar dep aita almaimyz. Sondyqtan PTR-testileý aiasyn aýyldarǵa deiin keńeitý qajet. Óitkeni, aýyl halqy ózin-ózi emdep otyrǵandyǵyn jasyrmai aitýymyz kerek. Olardyń meditsinalyq qyzmetke júginerlik jaǵdaiy bolǵan joq. Aýdan ortalyǵynan 300-400 shaqyrym shalǵaida jatqan aýyl turǵyndarynyń ortalyqqa barýǵa jaǵdaiy da kelgen emes. Sondyqtan kóbi úide emdeldi. Sondyqtan bolady-aý dep otyrǵan koronavirýs indetiniń ekinshi tolqyny kezinde jyljymaly meditsinalyq kómek qyzmetin jolǵa qoiyp, onda PTR-test ótkize alatyndai jaǵdai jasaý qajet», - dedi ol.
