Foto: «AMANAT» partiiasy baspasóz qyzmeti
Aqtóbe oblysy Prezidenttiń Sailaýaldy baǵdarlamasyndaǵy aýyl turǵyndarynyń tabysyn arttyrý jónindegi bastamalaryn júzege asyrýǵa alǵashqylardyń biri bolyp kiristi. Bul jumysqa «AMANAT» partiiasy belsendi atsalysýda. Búgin partiia Tóraǵasy Erlan Qoshanov óńirdegi sharýa qojalyqtarynyń ókilderimen kezdesip, «Aýyl amanaty» jobasynyń jańa kezeńin júzege asyrýdy talqylady jáne «Qarjylyq saýattylyqty arttyrý» jańa partiialyq jobasyn iske qosty.
Aqtóbe qalasynda Aýyl sharýashylyǵy ministri Erbol Qarashókeevtiń, oblys ákimi Eraly Toǵjanovtyń jáne memlekettik organdar ókilderiniń, óńirdegi aýyl sharýashylyǵy taýaryn óndirýshilerdiń qatysýymen «Aýyl amanaty» jobasyn iske asyrý máseleleri boiynsha keńes ótti. Oǵan barlyǵy 200-den astam adam qatysty.
Partiia Tóraǵasy Erlan Qoshanov Prezident Qasym-Jomart Toqaev óziniń sailaýaldy baǵdarlamasynda aýyl máselesin birinshi kezekke qoiyp otyrǵanyn atap ótti. Jalpy, aldaǵy 7 jylda aýyl turǵyndarynyń tabysyn arttyrýǵa 1 trillion teńge bólý josparlanyp otyr. Sonyń nátijesinde aýyl sharýashylyǵynda 350 myńnan astam jumys oryny ashylady dep kútilýde.
«Aýyl halqynyń turmysyn jaqsartyp, tabysyn arttyrý, barlyq áleýmettik máselelerdi shuǵyl sheshý úshin Úkimet «AMANAT» partiiasymen birlesip «Aýyl amanaty» jobasyn iske asyrýda. Biyldyń ózinde ony júzege asyrýǵa 52 milliard teńge bólindi. Partiia janynan ádisnamalyq súiemeldeýdi, azamattar men ákimderdi oqytýdy, ótinimderdi qabyldaý jáne qarajatty bólý protsesiniń monitoringin qamtamasyz etetin Jobalyq keńse ashyldy. Bul – aýyldardy kóterýge múmkindik beretin naqty qadam», - dedi Erlan Qoshanov.
Ol jobanyń pilottyq úlgisi Jambyl oblysynda jemisti júzege asyrylǵanyn, nátijesinde 11 aýyldyq okrýgte ortasha ailyq tabys 1,7 ese óskenin, ataýly áleýmettik kómek alýshylar sany 3 esege azaiǵanyn, jumyssyzdar sany 36% tómendegenin atap ótti. «AMANAT» partiiasy men Úkimettiń mindeti – «Aýyl amanaty» jobasyn barlyq óńirge engizý. Jobanyń barlyq artyqshylyǵy týraly halyqty durys habardar etý de mańyzdy.
«Aýyl amanaty» jobasy aiasynda nesie alýdyń yńǵaily ári jyldam bolýyna erekshe nazar aýdarylady. Ótinim ETsQ arqyly arnaiy tsifrlyq platformada onlain beriledi. Sonymen qatar, eger buryn nesieni maquldaý úsh aptaǵa sozylsa, qazir ol eń kóp degende úsh saǵatqa sozylýy kerek. Qajetti málimetter barlyq qol jetimdi derekqorlardan avtomatty túrde jinalady. Qazirgi ýaqytta tsifrlyq platforma pilottyq rejimde jumys isteidi.
Osy kúni Erlan Qoshanov Mártók aýdanynyń turǵyndarymen, «Aýyl amanaty» jobasynyń qatysýshylarymen kezdesip, jobanyń negizgi baǵyttary týraly aityp, turǵyndardyń suraqtaryna jaýap berdi. Partiia Tóraǵasynyń qatysýymen alǵashqy qaryz resimdeldi – sharýa qojalyqtarynyń biriniń basshysy Táńirbergen aýylynyń turǵynyna 4 mln teńgege taýarlyq nesie berdi.
Sondai-aq, Mártók aýdanynda aýyl turǵyndarynyń qarjylyq saýattylyǵyn arttyrýǵa baǵyttalǵan «Qarjylyq saýattylyqty arttyrý» partiialyq jobasy bastaldy.
«Bul aýyl turǵyndaryn alaiaqtardyń yqpalynan, qarjy piramidalaryna aldanyp qalýdan jáne basqa da kúmándi qarjylyq operatsiialardan qorǵaýǵa kómektesedi. Mundai jaǵdailarǵa tap bolǵan adamdarǵa konsýltatsiialyq kómek kórsetiledi. Aldaǵy ýaqytta 166 qarjy sarapshysy 250 myń adamdy qamti otyryp, elimizdiń shalǵaiyndaǵy barlyq eldi mekendi aralap shyǵady. Oqytýdyń bir kýrsy 5 kúnge sozylady», - dedi partiia Tóraǵasy.
Barlyq kezdesýde Erlan Qoshanov aýyldy damytý – Memleket basshysy saiasatynyń basty basymdyǵy ekenin atap ótti. Buǵan qomaqty qarjy bólinedi. Aýyldardyń infraqurylymyn – joldardy, densaýlyq saqtaý, bilim berý júielerin jáne t.b. aitarlyqtai jaqsartý josparlanýda. Jumys oryndary ashylýda. Al «AMANAT» partiiasy Prezident baǵytynyń qoǵamdyq tiregi retinde osy mindetterge qoldaý kórsetý úshin óziniń barlyq resýrsyn jumyldyrýǵa nietti. Partiia filialdary osy baǵytta jumys isteidi.
