Aýyl ákimderin tikelei sailaý búkil el úshin aitýly oqiǵaǵa ainalady. Mundai pikirdi Qazaqstan Respýblikasy Prezidentiniń kómekshisi, Ulttyq keńestiń hatshysy Erlan Qarin saraptamalyq talqylaýda aitty, dep habarlaidy QazAqparat.
Onyń aitýynsha, búginde aýyl ákimderi ákimdik korpýsynyń 90%-dan astamyn quraidy.
«Qazaqstan halqynyń 40 paiyzdan astamy aýylda turady. Sondyqtan aýyl ákimderin sailaý naýqany mańyzdy oqiǵa bolǵany bir bólek, bul shyn mánisinde azamattar men memlekettiń, bilik pen qoǵamnyń arasyndaǵy qarym-qatynastyń jańa printsipteriniń ornyqqanyn ańǵartady. Oosy reformalar qalai iske asady? Bolashaqta taǵy qandai bastamalardy júzege asyra alamyz? Bizdiń maqsatymyz - osy suraqtar aiasynda múmkindiginshe pikir almasý. Búgingi kezdesýde bizdiń áriptesimiz Andrei Chebotarevtiń daiyndaǵan saraptamalyq baiandamasyn tyńdadyq. Bul baiandamada sońǵy eki jylda jariialanǵan barlyq saiasi bastamalar taldanyp júielengen. Sonymen qatar, Prezident tarapynan adam quqyǵy máselesine qatysty birshama mańyzdy máseleler de kóterilgen. Osyndai kezdesýlerdiń nátijesinde búgin, mine, osy ýaqytqa deiin taldap qana qoimai, bolashaqta atqarylatyn basqa da reformalardy pysyqtaý múmkindigi týdy»,- dedi Erlan Qarin.
Aita keteiik, búgin Almatyda saiasi reformalardyń úsh prezidenttik paketin júzege asyrý boiynsha saraptamalyq talqylaý ótti.
Sharaǵa belgili qazaqstandyq sarapshylar, saiasattanýshylar, QR Parlamenti Májilisiniń depýtattary jáne ulttyq qoǵamdyq senim keńesiniń músheleri qatysty.
