25 maýsymda aýdandyq sailaý komissiialarynyń sheshimimen elimizdiń 14 óńiriniń 176 aýdany 730 sailaý okrýginde sailaý ótkizý jóninde sheshim qabyldandy, dep habarlaidy "Ult aqparat" aýmaqtyq sailaý komissiiasynyń baspasóz qyzmetine silteme jasap.
Naýqan bastalǵaly beri respýblika boiynsha barlyǵy 2322 kandidat, onyń ishinde 7 shildede - 102 kandidat aýyl ákimdigine usynyldy.
Onyń kópshiligi, atap aitqanda, 1455 adam (62,7%) – ózin-ózi usynǵandar, 867 adamdy (37,3%) saiasi partiialar usynǵan.
Saiasi partiialardyń ishinde eń kóp kandidat - 588 adamdy (67,8%) «NurOtan» partiiasy, 100 adamdy (11,5%) «Aýyl», 70 adamdy (8,1%) QHP, 56 adamdy (6,5%) «ADAL», 53 adamdy (6,1%) «AQJOL» partiialary usyndy.
Aita ketý kerek, JSDP partiiasy bir de bir kandidat usynbaǵan.
Sailaý jariialanǵan okrýgter sanynyń kóptigine bailanysty kandidattardyń eń kóbi Aqmola (300), Qaraǵandy (267), Almaty (247) jáne Shyǵys Qazaqstan (237) oblystarynda usynyldy.
Kandidattardyń eń azy Mańǵystaý (36), Atyraý (60) jáne Batys Qazaqstan (82) oblystarynda.
El boiynsha ortasha báseke bir orynǵa - 3,2 adam. Eń joǵary báseke Túrkistan (3,8), Mańǵystaý (3,6), Qaraǵandy (3,6) jáne Almaty (3,5) oblystarynda.
Eń azy Qostanai (2,3) jáne Batys Qazaqstan (2,6) oblystarynda.
Kandidattardy usyný 9 shilde saǵat 18:00-ge deiin jalǵasady, sondai-aq kandidattardy tirkeý de qatar (kandidattardy tirkeý 14 shilde saǵat 18:00-ge deiin) júrgiziledi.
7 shildedegi jaǵdai boiynsha 456 kandidat tirkeldi (usynylǵan kandidattardyń jalpy sanynyń 19,6%-y).
