Aýyl ákimderiniń tikelei sailaýyn ótkizýge bolady dep oilaimyn. Bul týraly Memleket basshysy Qasym-Jomart Toqaev Parlament palatalarynyń birlesken otyrysynda Qazaqstan halqyna jyl saiynǵy dástúrli Joldaýynda málim etti, dep habarlaidy QazAqparat.
«Memlekettik biliktiń barlyq derlik institýttaryn reformalaý kerek. Jańǵyrtýdyń negizgi maqsaty - tutas memlekettiń tiimdiligin arttyrý. Eger azamattarymyzdyń ál-aýqatyn shyn máninde jaqsartqymyz kelse, olardyń ózderin osy iske belsendi túrde tartqan jón. Aldaǵy saiasi reformalardyń barlyǵy halyqty memleket basqarý isine keńinen qatystyrýǵa baǵyttalýy kerek. Mysaly, qoǵamdyq pikir saýalnamalary aýyl ákimderiniń sailaý arqyly qyzmetke kelýine qatysty suranystyń artqanyn kórsetip otyr. Bul mańyzdy qadamdy jan-jaqty oilastyryp, dáiekti túrde júzege asyrǵan jón», - dedi Prezident.
Memleket basshysynyń aitýynsha, mundai júieniń qalai jumys isteitinin naqty bilý kerek. Alaida, bul máseleniń sheshimin keiinge qaldyrýǵa bolmaidy.
«Kelesi jyly birqatar aýyldyq okrýg ákimderiniń ókilettik merzimi aiaqtalady. Aýyl ákimderiniń tikelei sailaýyn ótkizýge bolady dep oilaimyn. Jergilikti bilik ókilderiniń sailanbaly bolýymen qatar, memlekettik basqarý deńgeileri arasyndaǵy quzyretterdi bólý jáne jergilikti ózin-ózi basqarý isin aiqyndap alýymyz qajet», - dedi Q. Toqaev.
