Aýyl ákimderin tikelei sailaý Qazaqstandaǵy jergilikti ózin ózi basqarý institýtyn damytý jolyndaǵy zańdy qadam.
Mundai pikirdi QR Prezidenti janyndaǵy Qazaqstannyń strategiialyq zertteýler institýtynyń direktory Zarema Sháýkenova bildirdi, dep habarlaidy QazAqparat.
«Aýyl ákimderin tikelei sailaý Qazaqstandaǵy jergilikti ózin ózi basqarý institýtyn damytý jolyndaǵy zańdy qadam sanalady. Jergilikti ózin ózi basqarý biýdjetiniń kiris bóligin arttyrý úshin Ulttyq ekonomika ministrligi ázirlegen túzetýlerge sáikes, biýdjettiń 4-deńgeiine salyqtar men tólemderdiń 4 túrin qosymsha berý kózdelgen. Olar: biryńǵai jer salyǵy, ýchaskelerdi jalǵa alý, paidalaný nemese satý tólemderi. Osylaisha, aýyl ákimderi tek qana basqarýshylyq emes, sonymen qatar jergilikti biýdjetti bólýdegi jekelegen máselelerde qarjylyq derbestik alady», - dedi Zarema Sháýkenova.
Onyń atap ótýinshe, bul óz kezeginde ákimderdiń aýyldardaǵy sýmen jabdyqtaý, joldardy kútip ustaý, abattandyrý syndy ómirlik mańyzdy bar birqatar máseleni sheshýdegi qyzmetiniń tiimdiligin arttyratyn bolady. Buǵan qosa, sailanǵan ákimderdiń sailaýshylar aldyndaǵy jaýapkershiligi artyp, aýyl turmysyn jaqsartýǵa degen yntasyn arttyrady.
«Qazaqstandyqtar, ásirese aýyldyq jerlerdiń turǵyndary ózderiniń sailaý quqyqtaryn belsendi paidalanyp, daýys berý kúninde sailaý ýchaskelerine belsendi keledi dep oilaimyn. Sonymen qatar kandidattarmen, olardyń sailaý shtabtarymen kezdesýlerge belsendi qatysyp, túrli aktsiialarǵa, is-sharalarǵa aralasyp, buqaralyq aqparat quraldarynda, áleýmettik jelilerdegi jańalyqtardy tyńǵylyqty qadaǵalap otyratyn bolady. Sailaýdy baiqaý institýtyn damytýǵa da bólek toqtalyp ótken jón. Saiasi partiialardyń baiqaýshylary, sailaýǵa túsetin kandidattar men qoǵamdyq uiymdar sailaýdyń ashyqtyǵy men zańdylyǵyn qamtamasyz etedi. Munan bólek, qazirgi ýaqytta elimizdiń óńirlerinde aýmaqtyq jáne ýchaskelik sailaý komissiialarynyń músheleri úshin seminarlar men treningter ótip jatyr. Komissiia múshelerin oqytý kýrstaryn ótkizý sailaýdy uiymdastyrýǵa jumyldyrylǵan tulǵalardyń quziretin arttyrýǵa múmkindik beredi jáne aýyl ákimderi sailaýyn ádil ótkizýdiń joǵary deńgeiin qamtamasyz etedi», - dedi institýt direktory.
