Aýtsorsing pen aýtstaffing. Bulardyń ne ekenin qazaqstandyqtar bile bermeidi. Biraq olar bizdiń ómirimizge etene enip alǵan eken. Jýyrda Májilis depýtaty Aiqyn Qońyrovtyń Premer-Ministr Baqytjan Saǵyntaevtyń atyna joldaǵan saýalynan sony bildik. Bular jaldamaly jumysqa alýdyń ádisteri kórinedi.
Bul sózderdiń ekeýinde de «aýt» degen sóz bar. Al aýttyń «syrtta», «oiynnan tys» degen maǵyna beretinin bilemiz. Demek osyndai ádistermen jumysqa turatyndar Qazaqstan Respýblikasynyń eńbek sharty men áleýmettik kepildikterin kózdeitin zańdarynan tys bolǵandyqtan, olardy qoldana almaidy degen sóz.
Depýtattyń aitýyna qaraǵanda, bizdiń eńbek salasyn baqylaityn vedomstvomyz ózin ózi qamtamasyz etetinder 2011 jyldan beri 600 myńǵa azaidy, al jaldamalylardyń sany 1 mln. 100-ǵa artty dep qýana jar salǵan eken. Qýanatyn sebebi – jaldamaly jumyskerler tabysyn jasyra almaidy, memleketke salyqty ýaqtyly tólep turady. Biraq az ýaqytta munshalyq kóp adamnyń aýysýynyń qandai syry bar degenge eshkim mán bermepti. Sóitsek, ózin ózi qamtityn jurt negizinen aýylsharýashylyǵynda azaiyp, 2011 jyldan beri 1 millionnan artyq adamǵa qysqarypty. Bul - shaǵyn jeri, azdaǵan maly, shaǵyn kásibi bar, qoly qysqalaý fermerler azaiyp, úlkenderge sińip ketken degen sóz. Bul da jaqsy emes, óitkeni mundaida aýylsharýashylyǵy óniminde básekelestik bolmaidy. Halyq korporatsiialardyń ónimin ǵana alýǵa májbúr bolady. Al azýyn aiǵa bilegen Amerika sekildi elder kerisinshe shaǵyn fermerlerdi qoldaidy.
Al endi osy aýylsharýashylyǵynan ketken adamdar qaida kirdi desek, olar aýtsorsing jáne aýtstaffing ádisterimen jumystarǵa jaldanady eken. Osy ádistermen ýaqytsha ǵana jaldanyp, joǵaryda atalǵan zańmen bekitilgen kepildikterge qol jetkize almaityndar osyndailar. Bulardy jaldaý bizneske tiimdi, óitkeni syiaqy bermeidi, eńbek demalysyn suratpaidy, aýyryp qalsa tólemaqy tólemeidi jáne t.t. Biznes tipti óziniń turaqty jumys isteitin personalynyń birazyn osy ádispen jaldaýǵa shyǵara bastapty.
Depýtat A.Qońyrov osy máseleni kóterip, atalmysh ádistermen jaldanatyndardyń áleýmettik kepildikteri men eńbek shartyndaǵy quqylaryn qorǵaýǵa nazar aýdaryp otyr. Joǵaryda atalǵan saýalynda A.Qońyrov ózi bastaǵan Májilistegi Halyqtyq kompartiia fraktsiiasynyń múshelerin tegis qol qoidyryp, Premer-Ministrden osy adamdardy esepke alýdy jáne olardyń quqyn qorǵaýdy talap etken.
S.ELEÝ, sarapshy
