Foto:championat.com
Qazaqstandyq Elena Rybakina álemniń 1-raketkasy polshalyq Iga Shventekti utyp, sporttyq mansabynda alǵash ret Australian Open týrniriniń shirek finalyna shyqty, - dep habarlaidy "Ult aqparat".
Match bir jarym saǵatqa sozyldy. Oiyn aldynda býkmekerlik keńseler Shventek jeńiske jetedi dep boljaǵan edi.
23 jastaǵy qazaqstandyq álemdik reitingtiń 21 jastaǵy kóshbasshysyn bir jarym saǵatta 6:4, 6:4 esebimen jeńdi. Elena 6 eis jasap, 6 breik-pointtyń tórteýin múlt jibergen joq. Al qarsylasy 2 eis, 2 breikpen kózge tústi.
Álemniń 22-raketasy (Rybakina) matchtan soń "Qiyn oiyn boldy, Igany qatty qurmetteimin, onyń soqqylary myqty. Al men qiyn sátterde jaqsy oinadym dep oilaimyn. Bul - úlken jeńis" dedi.
Endi týrnirdiń jartylai finalyna shyǵý úshin qazaqstandyq tennisshi latviialyq Elena Ostapenkomen oinaidy. Match 24 qańtarǵa josparlanǵan.
Aita keteiik, Rybakina byltyr Londonda ótken Wimbledon jarysynda jeńimpaz atanǵan. Ol - Grand Slam jarystarynda jekelei synda jeńiske jetken alǵashqy qazaqstandyq tennisshi.
Shventekpen ótken matchtan soń Elena "[Wimbledon jarysyndaǵy] jeńisten keiin Qazaqstan kóp qoldaý aldy, kóp adam meni qoldap, jarystarymdy kóre bastady. Jeńisten soń [Qazaqstanǵa] barǵandaǵy qoldaý keremet boldy. Meni qoldaityn barlyq jankúierge alǵys aitamyn" dedi.
