Qazaqstannyń birinshi, álemniń 12-raketkasy Elena Rybakina Aýstraliia ashyq chempionatynyń ekinshi ainalymyna shyqty, dep habarlaidy QazAqparat.
E.Rybakina bastapqy kezdesýin otandasy, reitingte 104-orynda turǵan Zarina Diiaspen ótkizdi.
Birinshi partiiada Elena breikpen alǵa ketti – 4:1. Degenmen Zarina izinshe qaiyra breik jasap, tarazy basyn teńestirdi – 3:4. Tai-breikte Z.Diias sáttirek oinady – 7:6 (7:3).
E.Rybakina ekinshi setti breikpen bastaǵanymen, Zarina qaita teńestirdi – 2:2. Esep 5:4 bolyp, Z.Diias alǵa shyqqanda, Elena meditsinalyq kómekke júgindi. Zarina matchboldy paidalana almasa, tai-breikte E.Rybakina basymdylyq kórsetti – 7:6 (7:3).
Úshinshi, sheshýshi partiiada Qazaqstannyń birinshi raketkasy 3:0 esebimen alǵa ketti. Taǵy bir breik – 5:1.
Elena 2 saǵat 35 minýtqa sozylǵan tartysty matchta 9 eis jasap, 12 breik-pointtyń tórteýin paidalandy. Zarina eis jasamai, 2 breikpen (10 breik-point) shekteldi.
E.Rybakina ekinshi ainalymda álemniń 40-raketkasy, shveitsariialyq Viktoriia Golýbich nemese reitingte 74- satydaǵy qytailyq Chjan Shýaidyń bireýimen kezdesedi.
Osylaisha Aýstraliia ashyq chempionatynda Qazaqstannan jekelei synda Aleksandr Býblik pen Elena Rybakina qaldy.
