Foto: ashyq derekkóz
Qazaqstandyq 17 jastaǵy tennisshi Zańǵar Nurlanuly Australian Open týrniriniń jasóspirimder sanatynda sátti óner kórsetip, jartylai finalǵa joldama aldy, dep habarlaidy Ult.kz.
Shirek finalda ol Gonkong ókili Kai Tompsonmen kezdesip, tartysty ótken úsh set nátijesinde jeńiske jetti — 3:6, 7:6 (7:4), 6:4.
Jartylai finalǵa shyǵý jolyndaǵy match Zańǵar úshin asa aýyr boldy. Úsh saǵatqa jýyq ýaqytqa sozylǵan kezdesýdiń sheshýshi setinde sportshynyń aiaǵynyń bulshyq eti qurysyp, meditsinalyq kómektiń kómegine júginýge týra keldi. Soǵan qaramastan, Nurlanuly matchty óz paidasyna aiaqtai bildi.
Aita keteiik, jas tennisshi buǵan deiin de iri jarystarda joǵary nátije kórsetken. Ótken jyly ol US Open týrniriniń jasóspirimder arasyndaǵy saiysynda da jartylai finalǵa deiin jetken edi.
Túrkistan oblysynyń týmasy sońǵy bir jyl ishinde joǵary deńgeidegi jasóspirimder týrnirlerine turaqty qatysyp keledi. Qyrkúiek aiynda ótken US Open jartylai finalynda ol jasóspirimder arasyndaǵy álemniń birinshi raketkasy, bolgariialyq Ivan Ivanovqa jol berdi.
Qazirgi tańda Zańǵar Nurlanuly Melbýrnde chempiondyqqa bir taban jaqyn. Buǵan deiin ol tailandtyq Kýnanan Pantaratorndy eki sette — 6:2, 6:1 esebimen jeńip, keiin 15 jastaǵy avstraliialyq Taika Takizavamen ótken kezdesýde úsh sette basym tústi — 7:5, 1:6, 6:3.
Eske sala ketsek, qazirgi ýaqytta Australian Open týrnirinde Qazaqstan atynan úsh tennisshi ónerin jalǵastyryp jatyr. Zańǵar Nurlanulymen qatar, áielder arasynda Elena Rybakina finalda Belarýs ókili Arina Sobolenkomen kortqa shyǵady. Al Anna Danilina serbiialyq Aleksandra Krýnichpen juptyq saiystyń finalynda baq synaidy.
Barlyq úsh match ta senbi, 31 qańtar kúni ótedi.
