Foto: alau.kz
Qostanai oblysyndaǵy Áýliekólde órtten zardap shekkenderge berilgen jańa úilerdegi káriz júiesi máselesi 2023 jyly sheshiledi. Jańa káriz júiesin salýǵa jergilikti biýdjetten 50 million teńge bólinedi, - dep habarlaidy Tengrinews.kz.
Qostanaida ótken oblystyq máslihattyń kezekten tys sessiiasynda Áýliekóldegi jańa úilerge káriz júiesin júrgizýge biýdjetten 50 million teńge bólinetini aityldy. Turǵyn úiler paidalanýǵa berilgennen keiin septikter merdigerler qalaýy boiynsha salynǵany, káriz júiesiniń qurylysy jobada qarastyrylmaǵany belgili boldy.
"Áýliekól aýylyndaǵy Birlik shaǵynaýdanynyń turǵyn úilerine arnalǵan jeke káriz júiesin salýǵa quny 267 million teńge bolatyn jobalaý-smetalyq qujattama ázirlendi. Ár úidiń astyna temirbeton buiymdaryna bekitilgen jeke plastikalyq septik salynady. Onyń qalyńdyǵy bir santimetr bolady, ol plastik bolady - jer asty sýlarynyń túsýine jol bermeý úshin. Sessiia qorytyndysy boiynsha oblys ákimdiginiń qarjy bólý týraly sheshimi túse salysymen merdigerdi anyqtaý rásimderin júrgizemiz", - dedi Qostanai oblysy ákimdigi qurylys bóliminiń basshysy Berik Tańjaryqov.
Káriz 2023 jyldyń 1 tamyzyna deiin tartylýy tiis. Qys mezgilinde merdiger anyqtalatyndyqtan, temir-beton buiymdaryn shyǵarý jáne konteinerlerdi satyp alý jumystary bastalady. Materialdar Qaraǵandydaǵy zaýytta shyǵarylady.
Eske salaiyq, Qostanai oblysyndaǵy jańa úilerdiń turǵyndary jaqynda qonystanǵan úilerin sý basqanyn aityp shaǵymdanǵany habarlanǵan bolatyn.
