Elorda politsiiasy esirtki satýshylardy ustaýǵa baǵyttalǵan aýqymdy arnaiy operatsiia ótkizdi, dep habarlaidy "Ult aqparat".
Nur-Sultan qalalyq Politsiia departamentiniń málimetinshe, jedel izdestirý sharalaryn ótkizý barysynda Jeńis kóshesi boiynda buǵan deiin isti bolǵan 39 jastaǵy qala turǵyny ustaldy. Onyń sómkesin tintý barysynda gashish salynǵan 13 polietilen paketi tabyldy. Sondai-aq kúdikti turyp jatqan páterdi tintý barysynda gashish salynǵan 3 polietilen paketi jáne satýǵa daiyn esirtki salynǵan 32 túiinshek tárkilendi.
«Arnaiy operatsiia nátijesinde zańsyz ainalymnan shamamen 20 keli esirtki zaty tárkilendi. Onyń qara bazarda bólshek saýda kezindegi quny 30 mln teńgeden asyp jyǵylady. Elorda aýmaǵyna esirtki jetkizýge jáne satýǵa qatysy bar qylmystyq tizbeniń ózge de qatysýshylaryn anyqtaýǵa baǵyttalǵan jedel izdestirý sharasy júrgizilip jatyr», - dedi vedomstvodan.
Qazirgi ýaqytta ustalǵan adamnyń ústinen QR Qylmystyq kodeksiniń 296-baby 4-bóligi, 297-baby 3-bóligi jáne 287-baby 2-bóligi boiynsha qylmystyq is qozǵalǵan. Kúdikti 10-nan 25 jylǵa deiin bas bostandyǵynan aiyrylýy múmkin. Ol Nur-Sultan qalalyq PD ýaqytsha ustaý oqshaýlaǵyshyna qamaldy. Tergeý amaldary júrgizilip jatyr.
