Aýǵanstannan kóship kelgen 35 adamnan turatyn tórt otbasy Aqmola oblysyna qonystandyrylýda, dep habarlaidy QazAqparat.
«Biyl 258 adamǵa kvota bólingen, biz kvotany 85 paiyzǵa ǵana igerdik. Kelgender Kókshetaý qalasynda, Atbasar, Sandyqtaý jáne Býrabai aýdandarynda ornalasqan. Olar barlyq rásimderden ótip, qandas mártebesin alady», - dep túsindirdi Ahmetjanova.
Zań sheńberinde qonys aýdarýshylarǵa otbasynyń árbir múshesine 70 ailyq eseptik kórsetkishten (200 myń teńgeden astam) birjolǵy járdemaqy qarastyrylǵan, sondai-aq jyl ishinde olar ai saiyn 15-ten 30 ailyq eseptik kórsetkishke deiin turǵyn úidi jaldaý jáne kommýnaldyq qyzmetterdi óteýge qarajat alatyn bolady.
Basqarma basshysynyń aitýynsha, otbasy músheleri qonystanyp, jumys tabady.
«Mysaly, Kókshetaýǵa quramynda toǵyz adam bar otbasy keldi. Olar «Novopek» JShS-de jumys isteitin bolady. Olar QR azamaty mártebesin alǵan kezde elimizdiń basqa azamattarymen teń dárejede ómir súretin bolady», - dep atap ótti Ahmetjanova.
Ol atap ótkendei, Táýelsizdiktiń 30 jyly ishinde Aqmola oblysyna turaqty turýǵa 8983 qandas keldi, onyń quramynda 40126 azamat bar. Aǵymdaǵy jyly óńirge barlyǵy 89 otbasy kóship keldi, olardyń quramynda 157 adam bar. Taldaý kórsetkendei, otbasylardyń 47,9 paiyzy Mońǵoliiadan, 29,5 paiyzy Ózbekstannan, 12,1 paiyzy Qytaidan kelgen.
