Aýǵanstan astanasy Kabýlde terakti kezinde qaza tapqan qazaqstandyqtyń otbasyna materialdyq kómek kórsetiledi. Bul týraly QR SIM baspasóz qyzmetiniń basshysy Ánýar Jainaqov málimdedi, dep habarlaidy Sputnik Qazaqstan tilshisi.
"Biz azamattarymyzǵa únemi kómek kórsetip kelemiz, ásirese qaiǵyly jaǵdaida qol ushyn berýge daiynbyz. Qazir Kabýlde terroristik qaýip áli saqtalyp tur. Teraktiden keiin tergeý júrip jatyr. Bizdiń Aýǵanstandaǵy diplomattarymyz qaza tapqan qazaqstandyqtyń ákesimen, týǵan-týysqandarymen únemi bailanysta. Kún saiyn olarmen telefon arqyly sóilesip turady. Qoldan kelgenshe marqumnyń otbasyna tolyq qoldaý kórsetip otyrmyz. Qazaqstan elshiligi men SIM memlekettik biýdjetten qarajat bólý tetigin iske qosty. Alaida, sizder bilesizder, bul úshin tiisti qujattardy jinap, belgili bir protsedýralar júrgizý qajet. Qazir bul ispen diplomattar ainalysyp jatyr", — dedi Jainaqov.
Onyń aitýynsha, Qazaqstan tarapy marqumnyń otbasyna máiitti elge jetkizý boiynsha kómek túrlerin usynǵan.
"Qazir máiitti Qazaqstanǵa jetkizý boiynsha túrli nusqa qaralyp jatyr. Biz óz kómegimizdi týǵan-týysqandaryna usyndyq. Osy protsedýralarmen ainalysatyn aýǵan kompaniialarynyń biri 20 myń dollar surady. Alaida bizdiń diplomattar basqa kompaniiaǵa júgindi, olar 6-7 myń dollar surap otyr", — dedi ol.
Esterińizge sala keteiik, ótken senbi kúni keshkisin Kabýlde qarýlanǵan sodyrlar Intercontinental Hotel qonaq úiine basyp kirdi. BAQ-tyń málimetinshe, 18 saǵatqa sozylǵan shabýyl saldarynan kem degende 43 adam ajal qushqan. 126 adam qutqaryldy, onyń 41-i sheteldik. Qonaq úige shabýyl kezinde 1978 jyly týǵan astanalyq biznesmen qaza boldy.
