Qorǵanys ministriniń orynbasary Timýr Dándibaev Aýǵanstandaǵy áskeri-saiasi ahýal týraly pikir bildirdi, dep habarlaidy QazAqparat.
Ortalyq kommýnikatsiialar qyzmetinde vitse-ministr Timýr Dándibaevtan BAQ ókilderi Aýǵanstandaǵy jaǵdaidyń qalai órbýi múmkin ekenin surady.
«Aýǵanstandaǵy qazirgi áskeri-saiasi ahýal aitarlyqtai kúrdeli. Dál qazir qandai da bir boljam jasaý qiyn. QR Qorǵanys ministrligi Aýǵanstan tóńiregindegi ahýal týraly aqparattardy únemi ózektilendirip otyr. Onyń ishinde sheteldik áriptestermen, óńirlik uiymdarmen ózara áreketterdi jiti pysyqtap otyr. Sondyqtan, atalǵan baǵytta ázirge naqty málimet aita almaimyz. Jaǵdaidy qadaǵalap, tiisti sheshim qabyldap jatyrmyz jáne kútý rejiminde turmyz», - dedi Qorǵanys ministriniń orynbasary.
Buǵan deiin ol Qazaqstan áskerileri Aýǵanstan shekarasyna qandai jaǵdaida jiberiletinin aitqan bolatyn.
«Halyqaralyq qaýipsizdik sharalaryn qamtamasyz etip, qoldaý úshin qandai da bir kontingentti jiberý úshin bizge birneshe shart kerek. Ol sharttyń biri – eki taraptyń biri Ujymdyq qaýipsizdik kelisimsharty uiymyna kómek surap júginýi tiis. Ekinshiden, Ujymdyq qaýipsizdik keńesi deńgeiinde sheshim shyǵýy qajet. Árine, ol sheshimdi bizdiń eldiń Parlamenti ratifikatsiialap, halyqaralyq missiia atqaratyn kontingenttiń jiberilýine ruqsat berý kerek. Osy sharttardyń bári oryndalǵan jaǵdaida biz sáikesinshe ózimizdiń halyqaralyq mindetterimizdi oryndaýǵa daiynbyz», - dedi Timýr Dándibaev.
