Aýǵanstan prezidenti Ashraf Ǵani tusynda vitse-prezident atanǵan Amrýlla Saleh. 2 tamyz 2021 jyl.
"Talibannyń" eldi basyp alýymen bilikten ketken aýǵan úkimetinen tek bir adam ǵana "tálip biligine eshqashan bas imeitinin", Aýǵanstanda qala beretinin málimdedi. Ol – Panjsher ýálaiatynyń týmasy, elden qashqan aýǵan prezidenti Ashraf Ǵanidiń tusynda vitse-prezident atanǵan Amrýlla Saleh.
"Aýǵanstannyń qazirgi konstitýtsiiasyna sai, prezident joq bolǵanda, qashqanda, otstavkaǵa ketkende ne qaitys bolǵanda, birinshi vitse-prezident prezident mindetin atqarýshyǵa ainalady. Men dál qazir eldemin jáne zańdy túrde prezident mindetin atqarýshymyn. Barlyq liderden maǵan jan-jaqty qoldaý bildirýdi suraimyn" dep málimdedi ol.
16 tamyz kúni Bi-bi-si tilshisi Ialda Hakim Amrýlla Saleh pen Ahmad Masýdtyń birge túsken sýretin jariialap, onyń astyna Aýǵanstanda tálipterge qarsy jańa koalitsiia qurylýy múmkin ekenin jazdy.
Ahmad Masýd – 1980-1990 jyldary aýǵan modjahedteriniń lideri, dala komandiri jáne qorǵanys ministri bolǵan Ahmad Shah Masýdtyń uly. Ol "Taliban" qozǵalysyna (Qazaqstanda tyiym salynǵan) qarsy kúsh jinai bastady. Bul týraly Ahmad Masýdtyń La Règle du Jeu frantsýz jýrnalyna joldaǵan hatynda aitylady. Jýrnaldyń iesi – tanymal jazýshy ári filosof Bernar-Anri Levi. Ol kishi Masýdtyń ákesimen dos bolǵan. Ahmad Shah Masýdty 20 jyl buryn "ál-Qaida" lańkesteri óltirgen.
Masýdtyń aitýynsha, Pandjsher provintsiiasy qarsylyq ortalyǵyna ainalǵan. Ol sol jerge baryp, ózin eldiń ýaqytsha basshysy dep jariialaǵan. Onda Aýǵanstannyń vitse-prezidenti Amrýlla Saleh te bar. Panjsher - "Taliban" baqylaýyna kirmegen jalǵyz aimaq. Ol Kabýldan soltústikke qarai 120 shaqyrym jerde ornalasqan.
Aqparat kózderine silteme jasaǵan BAQ málimetinshe, qazirgi ýaqytta Panjsherge 10 myń jaýynger jiberilip jatyr, onyń ishinde buryn Ózbekstanǵa qashqan marshal Abdýl Rashid Dostýmnyń kúshteri de bar.
Ahmad Masýdtyń haty:
"Aýǵanstanda kúsh kórsetý basym. (...) Bári osymen bitti me? Joq.
Ákem - komandir Masýd, bizdiń ulttyq batyr, maǵan mura qaldyrdy jáne bul mura - aýǵan bostandyǵy úshin kúres. Bul - endi meniń kúresim. Men jáne meniń serikterim qanymyzdy berýge daiynbyz. Biz barlyq azat aýǵandy, quldyqtan bas tartqandardyń bárin Panjsherge qosylýǵa shaqyramyz. Barlyq aimaq pen taipa jurtyna aitarym: bizben birge soǵysyńdar! Shetelde turatyn, biraq júregimizge jaqyn aýǵandarǵa aitarym: sizdiń Panjsherde áli berilmegen otandastaryńyz bar ekenin bilińiz. Bizge bostandyq úshin kúreste kómektesken basqa elderden surarym: "Qymbatty dostar, bizge taǵy bir ret, burynǵydai kómektese alasyzdar ba?" Keibireýdiń satqyndyǵyna qaramastan, biz áli de senemiz".
Ahmad Masýd 1940 jylǵy Eýropany aýǵannyń qazirgi jaǵdaiymen salystyrdy. Eldiń jeńilisi, Panjsherdi qospaǵanda, aiaqtaldy, al jeńilgender óz qatelikterinen táliptermen yntymaqtastyqty bastaidy.
"Búgin men general de Goll frantsýz áskeri jeńilgennen keiin ne aitqanyn oiladym: "Frantsiia urysta jeńildi, biraq soǵysta emes". Biz, aýǵandar, tipti shaiqasta jeńilgen joqpyz, óitkeni Kabýl soǵysqan joq. Biz birge Aýǵanstan tarihynyń jańa betin jazamyz. Qudaidyń kómegimen biz jeńemiz", - dep qorytyndylady ol.
RIA Novosti derekkózge silteme jasai otyryp, qazirgi ýaqytta vitse-prezident Amrýlla Salehtiń kúshteri Panjsherde "Taliban" qozǵalysymen soǵysyp jatqanyn jáne Kabýldyń soltústigindegi Parvan provintsiiasyndaǵy Charikar aimaǵyn sodyrlardan qaitaryp alǵanyn jazdy.
