M.Áýezov atyndaǵy Qazaq Memlekettik akademiialyq drama teatry Elbasy N.Á.Nazarbaevtyń «Rýhani jańǵyrý» baǵdarlamasy aiasynda tolymdy eńbekter atqaryp keledi. 7-21 qyrkúiek aralyǵynda Atyraý qalasy men oblys aýdandaryndaǵy Qazaqstannyń Eńbek Eri, KSRO halyq artisi Asanáli Áshimovtiń 80 jas mereitoiyna arnalǵan úlken gastroldik sapar, QR Mádeniet jáne sport ministrliginiń qoldaýymen qazan aiynyń basynda ótken London sapary, teatr maýsymasharyna arnalǵan «Teatr álemindegi rýhani jańǵyrý» atty Almaty qalasyndaǵy 8 teatrdyń basyn qosqan kórme jáne t.b. is-sharalar atalmysh baǵdarlama aiasynda jasaldy.
Teatr ujymynyń «Rýhani jańǵyrý» aiasyndaǵy josparly jumystary Jambyl men Ońtústik Qazaqstan oblystaryndaǵy kishi gastroldik saparmen jalǵasty. Bul is-sapar barysynda teatr ujymy aýdan ortalyqtary men eldi-mekender turǵyndarynyń nazaryna repertýardaǵy Nemat Kelimbetovtiń «Úmit úzgim kelmeidi» dramasyn usynady.
On jylǵa jýyq teatr repertýarynan túspegen qoiylymnyń qoiýshy-rejisserleri – Esmuhan Obaev pen Tóleýbek Aralbai.
Kórermenniń júregin jaýlap, ystyq yqylasyna bólengen qoiylymda J.Sadyrbaev, Ú.Seitimbet, J.Tolǵanbai, N.Ábilov, G.Tutova, Á.Sailaýova, M.Taǵanov syndy teatr artisteri óner kórsetedi.
Oqiǵasy aýrýhana palatasynda ótetin dramanyń bas keiipkeri, búginde jasy jetpisti alqymdaǵan Meiirbek baqyt týraly, ómirdiń máni týraly oiǵa shomady. Onyń jaqyn dostarymen ózara pikirtalas-oi taratýlarynan ózindik dúnietanymdary, ómir ustanymdary aiqyn tanylady. Dáýlet- jan dáýletimen, Asylhan – týǵan topyraqtan ajyramaǵan handyǵymen, Meiirbek – qudaidyń ózi ólshep bergen azdy-kópti ómirine yrzashylyǵy, qanaǵatymen daralanady. Dostardyń arasynda ómirlik jolyn, bálkim, durys tańdamaǵan Sovetbektiń ókinishi kóp…
Adamgershilik máseleleri sóz bolatyn qoiylymdy teatr ujymy 5,6,7 qarasha kúnderi Qulan, 8 qarashada Merki, 9 qarasha kúni Kókdónen, Qumaryq aýdandarynda 10,11 qarasha kúnderi Taraz, 17 qarasha kúni Shý, Qordai qalalarynda kórermen nazaryna usynady.
Atalmysh qoiylym 12,13 qarasha kúnderi Shymkent qalasynda, 14 qarashada Saryaǵash, 15 qarashada Abai aýylynyń mádeniet úiinde sahnalanady.
«Úmit úzgim kelmeidi» dramasyna jinalǵan kórermen qoiylym sońynan teatr artisteriniń kontserttik baǵdarlamasyn da tamashalai alady.
Gúlziia Sádýaqasova
